Wardacosta Caribe Hulandes ta intercepta boto cu droga cerca di Aruba

ORANJESTAD – Wardacosta Caribe Hulandes, cu apoyo di e barco patruyero di Marina Real Hulandes Zr.Ms. Groningen, a intercepta un boto sospechoso cu droga recientemente den awa cerca di Aruba. Asina Wardacosta a raporta dialuna. 

E operacion a cuminsa despues cu un avion di Wardacosta a detecta e boto sospechoso. Mesora, Zr.Ms. Groningen a drenta den accion pa intercepta e embarcacion.

Cu asistencia di un helicopter NH90, e helicopter di combate cu ta opera for di Zr.Ms. Groningen, dos boto tipo FRISC y un boto Metal Shark di Wardacosta a persigui e go-fast riba laman y finalmente a logra intercepta esaki.

E dos sospechosonan cu tabata a bordo di e go-fast, hunto cu e cargamento di droga, a wordo transporta pa e base di Wardacosta na Savaneta y despues entrega na Cuerpo Policial Aruba pa investigacion adicional.

Segun e informacion oficial, e droga confiscado ya a wordo destrui.

For di cuminsamento di juni, Zr.Ms. Groningen ta cumpli funcion como barco patruyero di Marina Real Hulandes den Caribe. E embarcacion ta monitoria e situacion di seguridad den region di e islanan ABC y ta brinda apoyo na operacionnan di Wardacosta Caribe Hulandes den lucha contra trafico ilegal y otro actividadnan criminal den e region.