PPA ta elogia AVP riba HOFA, pero AVP ta rechasa invitacion di PPA

ORANJESTAD – Un situacion politico interesante a desaroya rond di e debate tocante HOFA (Houdbare Overheidsfinanciën Aruba). Mientras partido PPA ta elogia e posicion reciente di AVP tocante e necesidad pa renegocia cierto aspectonan di e ley cu Hulanda, e mesun AVP a anuncia cu no lo participa den un sesion informativo cu PPA a organiza pa discuti e tema.

POSICION PPA

Lider di fraccion di PPA, Eduard Pieters, a expresa satisfaccion cu e reciente consehonan di Raad van Advies y Raad van State ta confirma loke su partido a bin señalando durante largo tempo: cu articulo 38 di Rijkswet HOFA tin problema y mester wordo modifica. Segun Pieters, e dos instancia constitucionalnan a indica cu e articulo actual no ta formula adecuadamente y mester wordo limita y cambia. E lider di PPA a pone enfoke special riba e hecho cu, despues di reunionnan na Hulanda, AVP tambe a expresa cu gobierno mester bay bek na mesa cu Hulanda pa renegocia contenido di HOFA basa riba e observacionnan di Raad van State. “Esaki ta un paso importante,” Pieters a declara. “Awor no ta solamente PPA cu ta señala cu tin problema, sino cu tin reconocimento di otro partidonan tambe.” PPA ta argumenta cu e consehonan reciente ta confirma cu e caminda actual no por sigui sin adaptacionnan. Segun e partido, e reto awor ta pa coregi e puntonan identifica mientras cu autonomia, Constitucion y Estado di Derecho di Aruba ta wordo respetá.

AVP: DEBATE MESTER TUMA LUGAR DEN PARLAMENTO

Aunke AVP a reconoci cu HOFA ta un tema di gran importancia pa futuro financiero di Aruba, e partido a informa oficialmente cu no lo participa den e sesion organiza pa PPA dia 16 di juni. Segun fraccion di AVP, un tema cu tin implicacionnan legal, financiero y constitucional tan amplio mester wordo trata den e foro institucional correcto: Parlamento di Aruba.\ AVP ta argumenta cu solamente den Parlamento representantenan electo di pueblo por evalua documentonan oficial, haci pregunta na gobierno y sostene un debate transparente cu participacion di tur actor relevante. E partido ta teme cu participacion den un actividad organiza pa un partido politico por crea e impresion robes cu e tipo di reunion ta sustitui e proceso democratico oficial. “Nos no kier contribui na ningun percepcion cu un actividad politico-partidario por reemplasa e debate institucional cu nos democracia parlamentario exigi,” AVP a expresa.

ACUERDO RIBA CONTENIDO, DESACUERDO RIBA  SCENARIO

Loke ta sali claramente for di e situacion actual ta cu PPA y AVP ta parce di comparti preocupacionnan similar tocante ciertos aspecto di HOFA, particularmente e recomendacionnan di Raad van State pa revisa articulo 38. Sinembargo, e dos partidonan no ta di acuerdo riba unda y con e debate mester tuma lugar. Mientras PPA ta busca amplia discusion publica riba e tema, AVP ta insisti cu e escenario correcto pa e debate ta Parlamento di Aruba. E resultado ta un paradoxo politico notable: PPA ta elogia AVP pa su posicion riba contenido di HOFA, pero AVP ta rechasa e invitacion pa participa den e plataforma cu PPA a crea pa discuti precisamente e mesun tema.