Aruba ta busca directivonan y hurista pa nobo Autoridad di Gaming

ORANJESTAD – Aruba a tuma un otro paso importante den e creacion di un Autoridad di Gaming. E entidad nobo, cu lo encarga cu otorgamento di permiso, supervision y cumplimiento di ley den sector di wega di suerte na Aruba, a habri vacantenan pa miembro di Junta Directivo y pa un hurista den e equipo di implementacion.

E vacantenan ta sigui varios luna despues cu a wordo anuncia cu Aruba ta trahando riba un reforma amplio di supervision di e sector di wega di suerte. E creacion di e autoridad independiente ta forma parti di e acuerdonan di reforma den e yama landspakketten. Segun e instancianan envolvi, e supervision actual ta fragmenta y falta un marco legal uniforme pa e sector.

ORGANO INDEPENDIENTE

For di e perfilnan publica ta sali cu e Autoridad di Gaming Aruba lo funciona como un organo administrativo independiente. Entre su tareanan principal ta otorgacion di permiso, supervision y cumplimiento di ley. Tambe lo supervisa proteccion di consumidornan, prevencion di adiccion na wega di suerte y combate contra criminalidad y lavado di placa den e sector.

CANDIDATONAN 

Annemarie Mooiweer a anuncia cu candidato ta wordo busca pa Junta Directivo y pa e posicion di hurista den e equipo di implementacion. E directivonan lo ta responsable pa direccion strategico di e organizacion, mientras cu e hurista lo contribui na desaroyo di ley, reglamentacion, directivanan di maneho y instrumentonan di supervision. Segun e plan di accion publica anteriormente, e implementacion actualmente ta den fase di ehecucion. Durante e fase aki lo nombra directivanan y personal y lo establece e sistemanan y procesonan necesario pa haci otorgacion di permiso, supervision y cumplimiento di ley posible. E planificacion ta cu e fase di implementacion lo sigui te cu 1 di april 2027. Despues di esey, e Autoridad di Gaming mester evoluciona pa bira un organizacion completamente operacional y financieramente independiente.