Pitcher arubiano Antwone Kelly a haci su debut den Grandes Ligas cu Pittsburgh Pirates

PITTSBURGH – Antwone Kelly, un pitcher naci na Aruba y prospecto numero 7 di Pittsburgh Pirates segun MLB Pipeline, a haci su \debut den Grandes Ligas diabierna anochi den e partido contra Miami Marlins na PNC Park. Kelly a ricibi e noticia cu e tabata promovi pa Grandes Ligas mientras e tabata hunga e video game “Rocket League” diahuebs anochi.

SENSASION INCREIBEL

“Ta un sensacion increible. Esaki ta un soño cu a bira realidad,” Kelly a declara. Den su prome aparicion den MLB, e pitcher arubiano a lanza 2.1 entrada, permitiendo dos carrera y dos hit. E la logra su prome ponche den Grandes Ligas ora cu e la elimina Jakob Marsee cu un sweeper.

RECTA EXPLOSIVO

Kelly, cu ta midi 5 pia y 10 duim, ta conoci pa su recta explosivo cu regularmente ta yega 97 miya pa ora. Durante 2026, e la supera e barrera di 100 mph un total di 17 biaha.\ E receptor Endy Rodríguez hasta a haci broma bisando cu Kelly ta lanza 110 mph.

KEN TA ANTWONE KELLY

Naci na Aruba, Kelly a firma cu Pittsburgh Pirates na 2021 como agente libre internacional pa un bono di 100 mil dolar. Durante temporada 2025, e la registra un ERA di 3.02 entre High-A Greensboro y Double-A Altoona, acumulando casi 10 ponche pa cada nuebe entrada. E  aña aki den Triple-A Indianapolis, Kelly a participa den 13 partido (10 como habridor), registrando un ERA di 4.50. Sinembargo, durante su ultimo 10 aparicionnan, e la baha su ERA te 3.28, mustrando progreso significativo. Kelly tambe a representa Reino Hulandes durante World Baseball Classic, unda e la permiti solamente dos carrera den tres entrada di labor. “Sea como habridor of relevista, mi ta cla pa loke e ekipo mester di mi,” Kelly a comenta.

PROMOCION HISTORICO PA ARUBA

Su promocion ta historico pa Aruba. Kelly ta e promet pitcher naci na Aruba cu ta yega Grandes Ligas den 17 aña. Segun Kelly, e prome yamada cu e la haci despues di ricibi e noticia tabata pa su mayornan. “Nan tabata yora na telefon,” e la relata. 

FAMIA A BIAHA PA PITTSBURG

Su famia a sali rumbo pa Pittsburgh diabierna pa presencia e momento historico. Pittsburgh Pirates ta spera cu Kelly lo aporta profundidad na bullpen, un area cu actualmente ta confronta reto. Promé cu e partido di diabierna, bullpen di Pirates tabata tin un ERA colectivo di 4.44, e cuarto peor den Liga Nacional. Pa Aruba, e debut di Antwone Kelly ta representa otro momento di orguyo den historia deportivo di isla y un inspiracion pa e proximo generacion di beisboldornan arubano.