Mike De Meza ta rechasa propuesta di arreglo di Ministerio Publico

ORANJESTAD – Mike de Meza y señora a informa Ministerio Publico diabierna mainta cu nan no por acepta e propuesta di arreglo cu a wordo presenta durante e encuentro “Cita cu Fiscal”. Asina e abogado Desiree Croes a confirma pa Noticiacla. Segun un carta firma pa abogadonan Desiree Croes y Diana Emerencia, e pareha ta considera cu e propuesta no ta basa riba fundamentonan factual y huridico correcto.

TUR COS TABATA BON

Den nan reaccion, famia De Meza ta señala cu, aunke tabatin cuestion tocante entrega laat di declaracionnan di impuesto, tur declaracion finalmente a wordo entrega, procesa y acepta door di Departamento di Impuesto. Segun nan abogadonan, Director di Impuestonan a confirma tambe den corte cu e declaracionnan a wordo ricibi y tramita correctamente.

TERMINO LEGAL PA PERSECUCION A VENCE PARCIALMENTE

Nan ta argumenta ademas cu, pa lo menos tocante un parti di e sospechanan relaciona cu infraccionnan fiscal, e termino legal pa persecucion penal ya a vence debi na prescripcion.

NO TA DI ACUERDO CU E ACUSACION 

Famia De Meza tambe no ta di acuerdo cu e acusacion cu nan deliberadamente a entrega declaracionnan incorrecto of incompleto. Segun nan posicion, e informacion entrega tabata suficiente pa autoridadnan calcula e impuesto debido, y efectivamente e impuesto correspondiente a wordo determina. Nan ta enfatisa cu no tabatin entrada escondi, patrimonio escondi ni perjuicio fiscal comproba.

TA RECHASA PROPUESTA

A base di esakinan, señor y señora De Meza a conclui cu nan no por identifica nan mes cu e base factual y legal di e propuesta di arreglo y, pa e motibo ey, a dicidi rechasa e oferta presenta door di Ministerio Publico. E declaracion a wordo presenta oficialmente na nomber di e pareha door di abogadonan Desiree Croes y Diana Emerencia.