Facebook y Messenger ta cay globalmente; miles di usuario no por drenta

NEW YORK – Facebook y Facebook Messenger a sufri un interrupcion grandi na nivel mundial diabierna mainta, causando cu miles di usuario a wordo saca automaticamente for di nan cuenta y no por drenta bek. Esaki ta conta pa Aruba tambe, pues cu na Aruba no por a usa e red aki. 

Hendenan cu a purba usa e servicio nan a haya mensahenan di error manera “un error inespera a sosode” of “algo a bay robes”, mientras cu Meta tabata trahando pa resolve e problema.

Aparentemente, otro plataforma di Meta manera Instagram y WhatsApp a sigui operando den gran parti, aunke algun servicio di Instagram tambe a reporta problema.

E fayo a cuminsa rond di 6:45 di mainta (ora Pacifico) y reportenan di interrupcion a bin for di diferente parti di mundo.

Te awor, Meta no a duna un splicacion oficial tocante e causa di e problema. Tambe no tabatin ningun actualisacion riba nan pagina oficial di estado di servicio pa indica e magnitud di e interrupcion.

Miles di usuario a acudi na otro rednan social pa confirma cu e problema no tabata limita na nan propio cuenta, sino cu tabata un fayo global cu a afecta Facebook y Messenger.