Varios detencion despues di explosion fuerte na Amsterdam

AMSTERDAM – Polis a detene varios sospechoso y a confisca varios auto despues di e explosion fuerte cu a sacudi un gimnasio den Amsterdam Nieuw-West durante anochi.

Autoridadnan no a revela ainda ora e detencionnan a tuma lugar ni exactamente pa cua delito e personanan a wordo deteni. Tampoco no tin informacion nobo tocante e causa di e explosion.

Poco despues di mei anochi, un explosion fuerte a ocuri den e gimnasio, cu normalmente ta habri 24 ora pa dia. Siete persona a wordo rescata for di e escombronan, di cual dos ta gravemente herida.

Bomberonan a evacua residente di e area y a pasa varias ora combatiendo e candela cu a surgi despues di e explosion.

Servicio di emergencia ta sospecha cu ainda por tin personanan bou di e ruina. Pa e motibo ey, e edificio ta wordo desmantela cuidadosamente cu makinaria pisa pa facilita e buskeda y rescate.

Segun e planificacion actual, e trabounan lo continua por lo menos te maintardi. Habitantenan di e apartamentonan cu ta pega cu e edificio afecta tampoco no por bolbe cas durante e proximo anochi.