Segun gobierno 37% di trahadornan lo beneficia di aumento den poder di compra

ORANJESTAD – Prome Minister Mike Eman diahuebs, a anuncia un serie di medida pa mehora e poder di compra di miles di ciudadano, cu enfoke special riba trahadornan cu entrada mas abou.

Gobierno lo aumenta e reparatietoeslag pa trahadornan cu salario minimo y esunnan cu entrada te Afl. 2.500. Segun cifranan di DAO, un total di 18.262 trahador, of 37,4% di e forsa laboral den sector priva, lo beneficia di e medida.

E grupo aki ta inclui 5.554 persona cu ta gana menos cu salario minimo, 4.389 cu ta gana salario minimo y 8.319 cu entrada entre salario minimo y Afl. 2.500.

Eman a aclara cu e medida no ta sustitui e dialogo cu patronnan y sindicatonan tocante un posible aumento di salario minimo, pero ta un forma inmediato pa duna alivio na famianan cu ta sinti e aumento den costo di bida.

E iniciativa ta forma parti di un pakete mas amplio cu ta inclui sosten adicional pa personanan cu handicap-uitkering y subsidio pa mitiga e aumento di prijs di combustibel. Gobierno ta indica cu e meta ta comparti e beneficio di e crecimiento economico cu mas ciudadano posible.