Gobierno a bin cu solucion temporario pa preparacion di medicamento na Hospital

ORANJESTAD – Gobierno a informa cu un espacio na Hospital cu ta wordo uza pa prepara cierto medicamento no ta adecuado mas pa e actividad ey. Pa evita interrupcion di servicio, inmediatamente a logra un solucion temporario den cooperacion cu Hospital, un botica local y CMC na Corsou.

Parti di e medicamentonan lo wordo prepara localmente, mientras otro lo wordo prepara na Corsou y transporta pa Aruba cu apoyo di Douane y Inspectie Volksgezondheid.

Gobierno a indica cu un espacio nobo y moderno pa prepara medicamento ta den construccion y mester wordo entrega na augustus di e aña aki. E proyecto ta forma parti di e renovacion y ampliacion di Hospital cu a cuminsa na 2013 y cu ainda tin algun componentenan pendiente.

Mientras tanto, Gobierno, Hospital y SOGA ta sigui trahando hunto pa completa e traspaso di facilidadnan pendiente y sigura cu e cuido medico no wordo afecta.

Segun Gobierno, e medidanan tuma ta garantiza seguridad, calidad y continuidad den preparacion di medicamento, manteniendo cuido medico di halto nivel pa pueblo di Aruba.