Mexico ta habri Mundial cu victoria riba Sur Africa den partido cu tres carchi cora

MEXICO CITY – Mexico a cuminsa su participacion den e Mundial 2026 cu un victoria convincente di 2-0 riba Sur Africa. Den e famoso estadio Estadio Azteca na Ciudad di Mexico, e pais anfitrion a domina gran parti di e encuentro, mientras cu Sur Africa a haye dificil pa crea peliger y a termina e partido cu solamente nuebe hungador. Mexico tambe a caba cu dies homber despues cu un carchi cora den e fase final.

Despues di un ceremonia di apertura  spectacular cu actuacionnan di Shakira y Burna Boy, un desfile di banderanan riba cancha y himnonan nacional canta cu hopi entusiasmo, e prome di 104 partidonan di e Mundial 2026 a cuminsa poco despues di 3:00 or di atardi, ora di Aruba.   

ERROR DEN CONSTRUCCION TA COSTA CARO

Mexico a crea e prome oportunidad despues di cuatro minuut, ora Raúl Jiménez a tira riba goal, pero e portero sudafricano Ronwen Williams a reacciona bon. Mexico a tuma control di e partido for di cuminsamento, mientras cu Sur Africa tabata spera oportunidadnan pa contraatake. E tactica defensivo no a dura hopi. Sphephelo Sithole a perde bala riba su mes mitar di cancha y Julián Andrés Quiñones a probecha e error pa score e prome goal di e Mundial 2026 y pone Mexico 1-0 dilanti.

Prome cu e halftime, Mexico a sigui presiona. Quiñones a bati e palo y Jiménez tambe a yega cerca di score, aunke tabata parce cu e tabata den posicion fuera di wega.

DOS CARCHI CORA PA SUR AFRICA

Poco despues di e descanso, Sur Africa casi a comete otro error grandi ora Williams a entrega e bala directamente na Álvaro Fidalgo, pero e no a logra conclui e oportunidad.

Dos minuut despues, e mal noticia a sigui ora Sithole a baha Brian Gutiérrez cu tabata drenta liber rumbo pa e goal. E arbitro no a duda y a mustra e prome carchi cora di e Mundial 2026.

Mexico finalmente a amplia e bentaja na 2-0 ora Jiménez a cabecea e bal aden despues di un centro di Roberto Alvarado. E delantero mexicano a reacciona cu emocion y hasta a yora despues di e gol.

PARTIDO A TERMINA CU TRES CARCHI CORA

Den e ultimo fase di e encuentro, Themba Zwane a duna Roberto Alvarado un golpi. Despues di revision di VAR, e arbitro Wilton Sampaio a mustra un di dos carchi cora pa Sur Africa.

No hopi despues, Mexico tambe a perde un hungador ora César Montes a baha Khuliso Mudau cu tabata drenta liber rumbo na goal. E decision a resulta den e di tres carchi cora di anochi.

Cu e victoria di 2-0, Mexico ta cuminsa su Mundial di un forma positivo, mientras cu Sur Africa mester recupera rapidamente despues di un actuacion decepcionante y dos expulsion.