Arnhem: “E preocupacionnan ta legitimo, pero solucion sostenible ta e unico salida”

ORANJESTAD – Alto Comisario di Polis Ramon Arnhem a expresa comprension pa e preocupacionnan cu a motiva e accion di un grupo di rechercheur diahuebs mainta, pero a enfatisa cu e reto di falta di personal den cuerpo policial no por wordo soluciona cu medida temporal. “E preocupacionnan di personal ta completamente hustificabel. Mi ta compronde cu hende a cansa di traha bou di e circunstancianan actual,” Arnhem a declara. “Mi ta comprende e accion sindical, aunke mi ta haya lamentabel cu a yega te esaki.”

ESCASEZ DI PERSONAL

Segun e comisario, e problema principal ta cu e escasez di personal no ta limita na Departamento di Recherche (DAR) so. E la señala cu practicamente tur division den cuerpo policial ta confrontando falta di personal. “Tur hende den cuerpo ta traha duro. No ta solamente DAR  tin escasez di personal. Si nos move personal for di un departamento pa otro, nos lo crea un problema nobo na e otro banda. Esaki mester un solucion sostenible.”

FALTA DI PERSONAL 8 AÑA

Arnhem a recorda cu e falta di personal no a nace awe. Segun  e, durante ocho aña consecutivo no ta tin promocionnan nobo di polis, mientras cu hopi empleado experencia a laga servicio door di pension of otro motibo. “Ocho aña largo no tabatin entrada nobo di personal. Si bo no añadi personal, pero hende si ta sigui sali, eventualmente bo lo haya escasez. Esaki no ta un problema di awe ni di ayera.”

ACADEMIA DI POLIS TA NA CAPACIDAD MAXIMO

Actualmente, segun Arnhem, Academia di Polis ta operando na su capacidad maximo cu aproximadamente dos promocion pa aña. E meta ta sigui aumentando e entrada di personal pa gradualmente elimina e deficit actual.

ACCION A SORPRENDE PARCIALMENTE

Riba e pregunta di Noticiacla cu si e comisario a keda sorprendi pa e accion di diahuebs mainta, e comisario a admiti cu e  la tende rumor cu posiblemente lo tabatin un accion di protesta, pero no tabata spera cu e lo desarroya den e forma cu a pasa. “Mi a tende den gangnan cu posiblemente lo tin un walkout, pero e forma cu e la sosode tabata un sorpresa. Principalmente pasobra ya tabatin medida y solucionnan na caminda pa yuda e departamento.”

CARTANAN LO HAYA CONTESTA

Segun Arnhem, algun di e preocupacionnan presenta den diferente carta y comunicacionnan oficial lo haya contesta formal e siman siguiente. “Nan lo haya contesta. Y lo ta un contesta cla y trankilisante. Mi ta un hende di hecho. Mi lo presenta e hechonan y e realidad manera e ta.”

DIALOGO TA KEDA ESENCIAL

Durante e entrevista, Arnhem a insisti cu comunicacion ta fundamental pa logra solucionnan duradero. “Prome cu bo por resolve un problema, bo mester compronde exactamente cua ta e problema. Y e miho forma pa logra esaki ta door di dialogo.”

Despues e la aclara cu e carta menciona door di sindicatonan proveni for di Ministerio Publico no tabata dirigi na cuerpo policial, sino na Ministerio di Husticia, y cu e preocupacionnan tocante escasez di personal ta afecta diferente institucionnan den cadena di husticia.

POLISNAN TA TRAHA ORA LARGO

Arnhem a reconoce cu hopi polisnan y rechercheurnan ta traha ora excesivamente largo. “Nan ta traha hopi duro. Esaki ta merece respet. Pero e problema no ta solamente seguridad di Aruba; pa mi, salud di nos empleadonan ta igual di importante.” Apesar di e presion actual, comisario a asegura cu cuerpo policial ta sigui garantisando seguridad di isla. “Nos ta sigui cuida seguridad di Aruba. Mi lo sigui haci tur loke ta den mi poder pa mantene seguridad y cuida bienestar di nos personal.”

NINGUN SANCION PA PARTICIPANTE DEN ACCION

Arnhem tambe a confirma cu no lo tin consecuencia disciplinario pa e empleadonan cu a participa den e accion. “Accion sindical ta parti di democracia. Mi ta comprende completamente cu nan ta preocupa y cu nan a busca un forma pa haci nan bos wordo tendi.”

NO MESTER BUSCA REFUERSO DI AFO

Finalmente, e comisario a enfatisa cu Aruba tin talento suficiente pa fortalece su propio cuerpo policial sin mester depende inmediatamente di reclutamento for di pais. “Nos tin suficiente talento arubiano. Nos ta prefera forma y desarroya nos propio polisnan. Tin promocionnan nobo den proceso y gradualmente nan lo fortalece e diferente departamento nan.”

Segun Arnhem, aunke e solucion no lo yega di un dia pa otro, e trabou pa resolve e crisis di personal ya a cuminsa y lo continua como prioridad pa cuerpo policial y Gobierno.