Mike de Meza no a dicidi si e ta tuma oferta ainda di Ministerio Publico

ORANJESTAD – Parlamentario Mike de Meza diaranson merdia a expresa su frustracion y preocupacion tocante e caso fiscal cu a pone su nomber den centro di atencion publico durante mas cu un aña. Durante un entrevista cu 24ora.com, De Meza a sostene cu mayoria parti di e alegacionnan original contra dje a keda sin base y cu loke ta resta ta solamente algun discrepancia administrativo relaciona cu “kruisjes” den e declaracion fiscal.

E PROCESO

Segun De Meza, durante henter e proceso, su ekipo di abogado, hurista y experto fiscal a presenta argumentonan tanto na Ministerio Publico como den Corte pa demonstra cu no tabatin debe fiscal pendiente y cu tur obligacion fiscal a wordo cumpli. “Tur e acusacionnan grandi tocante impuesto y supuesto cantidadnan grandi di placa a wordo kita for di mesa. Awor loke ta resta ta un  of dos asunto administrativo,” De Meza a declara.

MOTIVACION POLITICO ?

E parlamentario a bisa cu e situacion a haci’e cuestiona si tabatin motivacion politico tras e investigacion. E la lamenta loke el a describi como falta di profesionalismo den ciertonan instancia gubernamental. “Ta un lastima cu den 2026 bo ta mira practicanan cu ta haci bo cuestiona si tin represalia politico of otro motibo tras di nan,” e la comenta. De Meza a enfatisa cu segun informacion presenta den Corte, no tabatin impuesto pendiente, no tabatin perdida financiero pa Gobierno di Aruba y tampoco ningun beneficio personal cu el a ricibi. E la sostene cu e asunto ta draai rond di errornan administrativo cu, segun e, normalmente por wordo corrigi sin cu e asunto yega den tribunal.

DAÑA NOMBER

“Mi nomber a pasa un aña y mei den medio di acusacionnan, mientras cu finalmente nos ta papia di uno of dos kruisje cu no a causa ningun daño financiero na gobierno,” De Meza a afirma. Segun e parlamentario, e impacto mas grandi di e proceso no tabata financiero, sino reputacional. E la indica cu tanto su nomber como e di su famia a sufri daño significativo durante e investigacion.

“Bo nomber ta bira sushi. Esey ta e daño mas grandi,” De Meza a bisa.

FILTRA ACUSACIONAN CONTRA MINISTER 

Tambe e la argumenta cu Aruba mester considera crea mecanismo similar na Hulanda pa filtra acusacionnan contra minister y parlamentarionan prome cu nan yega den proceso penal formal. Segun e, esey por yuda preveni persecucion politico y daño innecesario na reputacion di personanan. “Mi no ta bisa cu politico no mester wordo procesa ora tin motibo. Pero mester tin un filtro serio pa determina si realmente tin base suficiente pa un caso,” e la expresa.

OFERTA DI MINISTERIO PUBLICO

Riba e pregunta tocante un posible oferta presenta pa Ministerio Publico pa cera e asunto, De Meza a indica cu ainda no tin un decision final. Segun e, e asunto ta wordo discuti cu su famia y asesor legal. “No ta apropia pa mi comenta riba esey awor. Prome mester tin consultacion cu mi casa y abogado. Despues nos lo comunica e decision,” e la  declara.

RELACION CU AVPO

Tocante su relacion cu AVP, De Meza a reafirma cu e ta sigui fiel na su partido, pero cu su prioridad principal semper lo ta e interes di pueblo di Aruba. “Prome cu mi defende un partido politico, mi lo defende pueblo di Aruba. Ora mi no ta di acuerdo cu algo, mi ta bisa esey claramente,” De Meza a conclui.