Wilhelminabrug ta haya su restauracion di mas grandi den mas cu 70 aña

ORANJESTAD – Departamento di Obra Publico (DOW) ta ehecutando un proyecto grandi di restauracion na Wilhelminabrug, considera como e trabou di mantencion mas extensivo cu e brug a haya desde cu a wordo construi mas cu 70 aña pasa.

E trabounan, cu a cuminsa na september 2025, ta enfoca riba reparacion y fortalecemento di e structura di concreto na parti abou di e brug, cu durante decadanan a sufri desgaste pa motibo di salinidad, humedad y otro influencia ambiental.

Segun vocero di DOW, Elisa Chieh Chen-Lake, varios seccion di concreto a mester wordo kita y reconstrui pa garantisa e siguridad y durabilidad di e infrastructura. A pesar di diferente reto logistico durante e ehecucion di e proyecto, e trabounan ta sigui conforme planificacion.

Wilhelminabrug, cu a wordo habri oficialmente na 1955, ta un conexion importante pa trafico riba L.G. Smith Boulevard. DOW ta spera completa e mayor parti di e restauracion durante juli of augustus di e aña aki, asegurando cu e brug por continua sirbi comunidad pa hopi decada mas.