Preparacion pa crisis den e parti Caribense di Reino

DEN HAAG - Mas di 60 colega di maneho di crisis di tur e partinan di Reino a reuni di 1 te cu 4 di juni na Den Haag pa e di 7 Siman di Maneho di Crisis den e partinan Caribense di Reino. Durante e siman, participantenan a intercambia conocemento y experiencia y a participa na un ehercicio di maneho di crisis, cu e meta pa tin mas gara riba situacionnan di crisis y un colaboracion optimal den caso di un crisis (inminente). 

ALGUN IMPRESION DI E SIMAN DI MANEHO DI CRISIS 

E siman di maneho di crisis a cuminsa cu e tema di resiliencia local como yabi pa un colaboracion resistente y despues a cuminsa traha conhuntamente pa concretisa e recomendacionnan tocante capacidad di maneho di crisis. Riba 2 di juni e dia a cuminsa cu e ehercicio conhunto di maneho di crisis, pa cua a entrena un sesion di informacion pa un horcan tropical basa riba Lucas, un horcan ficticio. Despues coleganan di USAR a duna splicacion tocante capacidad pa duna asistencia durante un horcan.  Tur participante a reuni riba diaranson, 3 di juni, na Landelijke Tactische Commando (LTC) di Koninklijke Marechaussee. Aya a splica funcion di Koninklijke Marechaussee den e area Caribense y e participantenan a siña mas tocante tareanan y funcionnan den caso di un crisis. E ultimo dia di e Siman di Maneho di Crisis, resiliencia cibernetico tabata central.  Diariamente tabatin sesionnan di trabou caminda e participantenan a atende problemanan di actualidad. 

E TA CONTINUA

E participantenan ta wak bek cu satisfaccion riba e di 7 Siman di Maneho di Crisis. Colaboracion y preparacion tabata e temanan central. Asina por ehempel conhuntamente nan a aporta cu idea pa plan y accion riba tereno di reserva strategico cu lo sigui elabora mas e periodo benidero y a palabra pa traha pa yega na un standard comun pa competencia profesional. 

PARTICIPANTENAN

Ministerio di Asuntonan Interno y Relacionnan den Reino y ministerio di Husticia y Siguridad a organisa e siman. Diferente representante di organisacionnan di crisis di e 6 islanan Corsou, Aruba, Sint Maarten, Boneiro, Sint Eustatius y Saba, colaboradonan di diferente ministerio y partnernan di cadena manera ‘Knooppunt Coördinatie Regio’s-Rijk’ (KCR2) y Urban Search and Rescue Team (USAR.NL) a bini hunto.