Magic 96.5 FM ta cla pa trece emocion di Mundial 2026 na Aruba

ORANJESTAD – Copa Mundial FIFA 2026 ta den porta y Magic 96.5 FM a confirma cu lo brinda un cobertura amplio y special pa fanaticonan di futbol na Aruba durante henter e torneo.

E emisora a anuncia cu lo transmite mas cu mitad di tur e weganan oficial na bibo, permitiendo cu oyentenan sigui e accion mundialista durante e proximonan siman. Ta trata di por lo menos 60 di e 104 weganan.

Na cabez di e cobertura lo ta narador veterano Cadochi Kock, cu durante añanan a bira un di e voznan mas reconoci den futbol Arubano. E lo wordo acompaña pa un team di comentarista  y invitadonan special.

Entre e principal analistanan ta Devin de Veer, cu lo aporta comentario, analisis y perspectiva tecnico riba e diferente encuentro . Segun Magic FM, su experiencia y conocemento di futbol lo agrega valor importante na cobertura.

Ademas di e transmisionnan en bibo, e emisora lo presenta segmentonan especial manera “Info Mundial”, cu actualisacionnan internacional y reaccionnan directo for di Hulanda.

Magic FM tambe lo organisa transmisionnan especial for di diferente locacion na Aruba, incluyendo Eagle Bowling, Tierra del Sol y Centro di Bario Playa Pabou, permitiendo cu fanaticonan reuni y comparti e experiencia mundialista.

Segun e emisora, e meta no ta solamente cubri futbol, sino crea un experiencia mundialista completo pa Aruba, combinando transmisionnan na bibo, analisis profesional, participacion di comunidad y entretenemento durante henter e torneo.