Auto di Gabinete di Gobernador a bay awa despues di accidente na Lagun

ORANJESTAD – Un accidente di trafico a sosode diabierna merdia den centro di Oranjestad, resultando den un vehiculo oficial di Gabinete di Gobernador bayendo awa despues di kibra e hero di seguridad na banda di e brug di Lagun. 

Segun informacion inicial, e accidente a involucra un Mercedes-Benz di Gabinete di Gobernador y un Nissan March blauw. E Nissan March, cu tabata circulando for di Caya Ernesto Harms, presuntamente no a duna preferencia na e Mercedes-Benz cu tabata biniendo pa Zoutmanstraat, causando un impacto entre e dos vehiculonan.

Debi na e forza di e dalmento, e Mercedes-Benz a perde control, a kibra e hero di proteccion na canto di e brug y a termina den awa.

Afortunadamente, no tabatin niun persona herida como consecuencia di e accidente. Noticiacla a compronde cu e director di gabinete tabata den e auto, y fuera di un susto grandi, no a sufri herida. Sin embargo, e dos vehiculonan si a sufri daño material considerable.

Polis a cordona e area temporalmente pa facilita e trabou di emergencia y e investigacion. Personal di Forensys tambe a presenta na sitio pa documenta e escena y prepara e informe oficial tocante e causa exacta di e accidente.

E investigacion den e caso ta continua. NOTA: Potretnan ta cortesia di 24ora.com.