Comite di Pasado di Sclavitud ta enfoca riba conciencia, conmemoracion y transmision di conocemento

ORANJESTAD – Miembronan di e Comite di Conmemoracion di Pasado di Sclavitud (Herdenkingscomité Slavernijverleden) Lucia Beck y Jefka Alberto a enfatisa e importancia di conciencia historico, conmemoracion y transmision di conocemento entre generacionnan durante un entrevista diahueba anochi den NoticiaCla Live cu periodista Tito Laclé.

TRAHA HUNTO

Segun  Beck y  Alberto, e obhetivo principal no ta pa bin for di Corsou of Hulanda pa bisa Aruba con pa mira su pasado, sino pa traha hunto cu organizacionnan local, reconociendo cu cada isla den Caribe tin su propio historia y experiencia. "Nos ta traha cu partnernan local, pasobra cada comunidad tin su propio pasado y su propio realidad," Beck a splica  . E la agrega cu conciencia tocante pasado di sclavitud ta fundamental pa compronde mihor e impacto cu e historia a laga riba generacionnan sucesivo.

CONMEMORACION 1 JULI

Un aspecto importante di e trabou di e comite ta conmemoracion di 1 di juli, dia cu a marca e abolicion di sclavitud den e antiguo Reino Hulandes. Segun Beck, e fecha ta merece un momento di reflexion y recordacion. "Ta un momento pa para keto y reflexiona riba loke a pasa y riba e significado di libertad," e la expresa. Ademas di conmemoracion, e comite ta enfoca riba comparticion di conocimiento entre generacionnan. E lidernan a señala cu tin hopi investigacion y historia di antepasadonan cu a lucha pa libertad y igualdad, conocimiento cu no mester perde cu paso di tempo.

FORTALECE NGONAN 

Otro prioridad ta fortalece NGO-nan y organizacionnan comunitario pa nan por sigui e trabou di conciencia y educacion. Segun e grupo, apoyo financiero y colaboracion cu diferente organizacionnan den Caribe y Hulanda por yuda crea proyectonan cu impacto duradero den comunidad. Durante e entrevista, Alberto a splica cu e comite frecuentemente ta usa e palabra "curashi" como punto di entrada pa inicia conversacionnan cu comunidad. "Ora nos papia di sclavitud, algun hende ta bisa cu esey ta algo di pasado. Pero ora nos papia di curashi, hende ta conecta mas facil cu e tema, pasobra curashi ta algo cu pasa di generacion pa generacion," Alberto a comenta.

HOPI INTERES DI HOBENAN 

Segun e, hobennan ta mustra hopi interes den e tema. Durante diferente encuentro reciente, e comite a nota cu huventud ta hopi receptivo y curioso pa aprende mas tocante historia, identidad y e experiencia di generacionnan anterior. E representantenan a conclui cu door di conciencia, educacion, conmemoracion y colaboracion cu organizacionnan local, e comunidadnan por sigui fortalece e conexion cu nan pasado y construi un futuro mas consciente y inclusivo.