Camara di Comercio kier combati economia informal y amplia base di impuesto

ORANJESTAD – Camara di Comercio y Industria di Aruba (KVK), segun representante di e organisacion, sr Robert Croes, diahuebs durante nan conferencia di prensa, a lanta preocupacion riba e crecemento di economia informal na Aruba y a anuncia un iniciativa pa stimula mas negoshinan pa formalisa nan operacionnan. Segun Croes, despues di pandemia di COVID-19 tabatin un aumento notable den actividadnan economico informal. E a señala cu ta bira cada vez mas comun pa hende ofrece servicio for di cas, cu of sin registracion oficial, creando un competencia desleal pa empresarionan cu ta cumpli cu tur obligacionnan legal y fiscal.

CREA ECONOMIA RESILIENTE Y TRANSPARANTE

"E meta ta pa logra un economia resiliente y transparente, unda tur negoshi ta registra na Camara di Comercio, ta opera di forma cla y ta paga su parti husto di impuesto," Croes a explica. Croes a aclara cu KVK no ta enfoca riba actividadnan ilegal manera trafico di droga, sino riba empresanan y actividadnan economico cu ta opera pafor di e sistema formal. Segun e, e situacion actual ta crea un carga adicional pa empresarionan registra, mirando cu negoshinan informal generalmente no ta paga BBO, AZV, SVB, pensioen y otro obligacionnan.

CONSECUENCIA NEGATIVO PA TRAHADORNAN 

Ademas, e practica tin consecuencianan negativo pa trahadornan. Persona cu ta traha den e sector informal frecuentemente no tin cobertura di seguro social ni otro proteccionnan den caso di malesa of perdida di entrada. Croes a revela cu un estudio di Medina Aruba den 2021 a estima cu aproximadamente 19% di Producto Interno Bruto (PIB) di Aruba tabata proveni di economia informal. Esaki ta representa cerca di 1,4 biyon florin den actividad economico y aproximadamente 340 miyon florin den entrada fiscal cu gobierno no ta ricibi.

CAMPAÑA DI CONCIENTISACION 

Pa enfrenta e problema, KVK ta cuminsa cu un campaña di conscientisacion y ta trahando cu diferente stakeholdernan, incluyendo banconan y otro institucionnan. E enfoke principal ta pa informa emprendedornan tocante e bentahanan di formalisa nan negoshi. Entre e incentivanan existente tin excepcion fiscal te 50.000 florin durante e prome cinco aña, posibilidad di exoneracion di BBO y AZV den ciertonan caso, deduccion di interes di prestamonan comercial y mihor acceso na financiamiento y microcredito. Croes a indica cu despues di e campaña di informacion, KVK kier implementa un proceso di acompañamento cu workshopnan, orientacion y apoyo paso pa paso pa guia empresarionan den e proceso di formalisacion.

AUMENTA CANTIDAD DI NEGOSHI REGISTRA 

Segun e, e obhetivo final ta pa aumenta e cantidad di negoshinan registra, amplia e base di impuesto, reduci presion fiscal riba empresanan cu ya ta cumpli cu nan obligacionnan y fortalece colaboracion entre sector publico y priva. "E resultado cu nos ta busca ta un economia mas fuerte, mas transparente y mas resiliente pa Aruba," Croes a conclui.