Confiansa di consumidor na Aruba ta mehora, pero preocupacion riba prijsnan ta sigui

ORANJESTAD – Consumidornan na Aruba a mustra un poco mas optimismo na final di 2025, segun e mas reciente Encuesta di Confiansa di Consumidor di Banco Central di Aruba (BCA). E Indice di Confiansa di Consumidor a subi cu 3,6 punto te na 96,4 den e di cuater trimester di 2025, aunke e resultado ainda ta indica cu consumidornan ta keda cauteloso tocante e economia.

Segun BCA, e mehoracion a wordo impulsa door di un percepcion mas positivo tanto di e situacion economico actual como di e expectativanan pa futuro. E Indice di Habito di Consumidor a crece cu 4,2 punto te na 97,7, mientras cu e Indice di Situacion Actual y e Indice di Expectativa a registra un subida di 3,9 y 3,2 punto respectivamente, alcanzando 96,3.

A pesar di e mehoracion den confiansa, prijsnan continua ta un preocupacion importante pa hopi hogar. Un total di 88% di e respondentenan ta spera cu prijsnan lo sigui subi den e siguiente seis luna, aunke esaki ta dos punto porcentual menos compara cu e trimester anterior.

E encuesta tambe a mustra algun señalnan positivo tocante e situacion financiero di famianan. E cantidad di hende cu a indica cu nan por cumpra menos cu nan entrada compara cu seis luna pasa a baha ocho punto porcentual te na 80%. Ademas, e porcentaje di respondentenan cu a expresa cu nan ta spaar menos a baha significativamente cu 14 punto porcentual te na 32%.

BCA a indica cu, aunke consumidornan ainda ta mira e futuro cu cierto reserva, e resultado di e encuesta ta demonstra cu e sentimiento economico general a fortalece durante e ultimo parti di 2025.

E informe completo di e Encuesta di Confiansa di Consumidor ta disponible riba e website oficial di Banco Central di Aruba.