Dos muher deteni despues cu video di agresion a bay viral

ORANJESTAD – Un investigacion rapido di Polis a conduci na detencion di dos hende muher den conexion cu un caso di agresion cu a tuma lugar diadomingo 31 di mei. E incidente a gana hopi atencion publico despues cu un video di e hecho a circula ampliamente riba diferente plataforma di red social.

Segun Cuerpo Policial di Aruba, e investigacion a wordo lidera door di recherche di Departamento Hubentud y Costumbernan (JZP), cu apoyo di recherche di Oranjestad. Danki na cooperacion estrecho entre e diferente unidadnan y un accion rapido, polis a logra localisa y detene e sospechosonan involucra den e caso.

E dos personanan deteni ta un hende muher di fam K., naci na Aruba y di 21 aña di edad, y un menor di edad, tambe di fam K., di 14 aña.

Polis a reitera cu violencia y agresion no tin luga den nos sociedad y a enfatisa cu lo sigui tuma accion firme contra cualkier persona cu participa den acto di violencia. Autoridadnan a destaca cu ta importante pa mantene respeto y seguridad den comunidad.

Cuerpo Policial Aruba ta sigui haci un apelacion na publico pa coopera cu investigacionnan criminal. Personanan cu tin informacion tocante e caso, of cu a mira algo sospechoso, por contact e TIPLIJN 11141. Tur informacion lo wordo trata den tur confidencialidad y e informante lo keda completamente anonimo.