Wever: Economia di Aruba lo pasa 8 biyon florin den 2026

ORANJESTAD – Ministro di Finansa Geoffrey Wever a indica  diahuebs cu e ultimo proyeccionnan economico ta mustra cu Aruba ta sigui den un fase di crecimiento constante. Segun e informe mas reciente di Departamento di Asuntonan Economico, Comercio y Industria (DEACI), e desaroyo positivo cu a wordo observa durante 2025 ta premira pa continua durante e proximonan dos aña.

TURISMO

Wever a señala cu turismo a sigui ta un di e motornan principal di e economia. Durante 2025, e cantidad di bishitantenan cu a pasa anochi na Aruba a yega aproximadamente 1.5 miyon, representando un aumento di 7 porciento compara cu e aña anterior. Na mes tempo, e mercado laboral a fortalece cu mas di 3.000 relacionnan di trabao nobo.

MEDIDANAN FISCAL

Segun ministro, diferente medidanan fiscal y social a contribui na aumenta poder di compra den comunidad. Entre esakinan ta e reduccion di impuesto pa ciertu grupo di contribuyentenan y e aumento di beneficio pa pensionadonan, loke a genera mas entrada disponibel y mas actividad economico.

CRECEMENTO NOMINAL

DEACI a revisa su calculacionnan pa 2025 y awor ta estima cu e Producto Interno Bruto (PIB) lo cera e aña cu un crecimiento nominal di 6.4 porciento, alcanzando aproximadamente Afl. 7.978 biyon. Pa 2026, e expectativa ta cu e economia lo sigui creciendo te supera e marca historico di Afl. 8 biyon, llegando na un nivel proyecta di Afl. 8.078 biyon. E informe ta indica tambe cu consumo priva lo continua expande durante 2026. E crecemiento aki ta relaciona cu aumentonan den beneficio di AOV, apoyonan adicional pa pensionadonan y alivio den costonan di seguro medico pa ciertu grupo di adulto mayor.

PERSPECTIVA OPTIMISTA

Aunke inversionnan priva  y publico por mustra algun desaceleracion door di retraso den ehecucion di diferente proyecto, DEACI ta mantene un perspectiva optimista tocante e rumbo general di economia. Pa 2027, e departamento ta proyecta otro aumento di 4.1 porciento, cu lo eleva e PIB na aproximadamente Afl. 8.408 biyon.

INFLACION

Riba tema di inflacion, e informe ta mustra cu e nivel di aumento di prijsnan a keda hopi limita durante 2025. Sinembargo, pa 2026 ta existi expectativa di un aumento te aproximadamente 3 porciento, principalmente como resultado di incertidumbre internacional y desaroyonan den Medio Oriente cu por influi prijs di energia y combustibel.

DEACI tambe a analiza diferente scenario economico alternativo. Den caso cu tensionnan geopolitico mundial persisti pa un periodo mas largo, e ritmo di crecimiento por reduci. Di otro banda, si turismo sigui superando expectativa, e economia por logra resultado ainda mas favorable cu e proyecta actualmente.

Gobierno y DEACI a confirma cu lo continua monitorea e desaroyo economico di cerca pa sigura cu Aruba mantene un base financiero fuerte y cu e crecimiento ta beneficia e pais durante e proximonan añanan.