OM: Escases na recherche ta pone husticia bou presion

ORANJESTAD – Ministerio Publico (OM) a reacciona riba noticianan reciente den media tocante e   carsedad  grave di personal den e departamento di recherche di Cuerpo Policial Aruba. Segun OM, ta importante cu comunidad haya un bista completo di e problema y di e consecuencia cu e situacion actual ta teniendo pa sistema di husticia.

Ministerio Publico ta encarga pa maneha investigacionnan criminal y   persecucion penal. Pa e trabou aki por wordo ehecuta di manera efectivo, ta esencial pa tin suficiente personal di recherche disponibel pa haci investigacionnan na tempo y den forma profesional.

Segun OM, varios luna pasa ya Minister di Husticia a wordo adverti oficialmente tocante e situacion preocupante. Den un carta manda pa e minister, OM a indica cu e falta di recherche a yega na un punto unda un cantidad considerable di denuncia ya no por wordo trata dentro di un periodo razonabel.

Ministerio Publico a expresa preocupacion cu regularmente no por duna e ciudadano un splicacion satisfactorio tocante e tardansa den investigacionnan, algo cu por afecta e confiansa cu comunidad tin den gobierno y den sistema di husticia.

Segun OM, e raiz di e problema ta den falta di inversion structural durante varios gobierno consecutivo. E instancia a señala cu no a pone e recursonan financiero disponibel cu ta coresponde cu e formacion oficialmente aproba pa organisacionnan manera Cuerpo Policial Aruba, Ministerio Publico y Koreccion  Institucional Aruba (KIA).

E formacionnan oficial ta determina cuanto personal ta necesario pa por cumpli cu tur obligacionan legal di cada departamento. Den caso di Polis, e plan di formacion ta mustra claramente cu tin necesidad di un aumento significativo di personal di recherche.

OM a enfatisa cu e departamentonan hudicial no ta maneha nan propio presupuesto di personal y pa e motibo ey ta completamente dependiente di e decisionnan financiero cu gobierno ta tuma. Sin suficiente fondo disponibel, ta resulta imposibel pa cumpli cu tur tarea legal cu e organisacionnan ta obliga pa ehecuta.

Ademas di e problema existente, Ministerio Publico a recorda cu na maart 2025 gobierno a implementa un cortamento adicional di 10% riba e presupuestonan di tur entidadnan den cadena hudicial. Segun OM, e medida aki a aumenta ainda mas e presion riba un sistema cu ya tabata confrontando falta di recurso y personal.