De Freitas(SNBA): “HOFA lo pone Aruba den un carga financiero aun mas grandi”

ORANJESTAD – Presidente di San Nicolas Business Association (SNBA), Errol de Freitas, a expresa fuerte preocupacion tocante introduccion di e ley di reino HOFA y e impacto financiero cu e acuerdo por tin riba Aruba. Durante un entrevista amplio cu Tito Laclé den programa Noticiacla LIVE diamars anochi, de Freitas a cuestiona si Aruba realmente ta beneficiando di e direccion financiero cu pais ta tumando actualmente.

CARGA FINANCIERO

Segun de Freitas, Aruba ya ta pagando un carga financiero hopi halto despues di COVID, y introduccion di HOFA solamente lo aumenta e presion economico riba pais. E la enfatisa cu Aruba durante hopi aña a logra mantene su obligacionnan financiero sin necesidad di pidi Hulanda pa “salba” pais. “Aruba no a pidi nada di Hulanda. Durante hopi aña nos mes a logra sigui andando,” de Freitas a declara.

INTERES 

Presidente di SNBA a splica cu Aruba actualmente ta paga aproximadamente 6.9 porshento di interes riba su debenan y cu pais no por sigui carga mas prestamonan sin pone futuro financiero di Aruba den peligro. “Nos a coba e buraco nos mes. No ta un cos cu a cai for di cielo,” e la comenta.

FALTA DI INFORMACION

Segun de Freitas, e principal preocupacion di sector empresarial no ta solamente HOFA mes, sino falta di informacion y claridad tocante e trayecto financiero cu Gobierno kier sigui. E la expresa frustracion cu, segun su criterio, ni Parlamento ni comunidad a ricibi informacion completo tocante e  strategia di salida, e riesgo y e impacto real di HOFA. “Niun no ta sa exactamente con e sistema lo funciona ni ki cos ta e exit strategy,” de Freitas a bisa.REUNION KVK E la relata cu durante un reciente reunion na Camara di Comercio, Minister Geoffrey Wever a presenta mas informacion tocante HOFA cu, segun de Freitas, Parlamento mes ainda no a discuti profundamente. “E informacion cu nos a tende na Camara di Comercio, nos no a tende den Staten,” e la expresa. Presidente di SNBA a enfatisa cu organisacionnan empresarial no ta contra supervision of bon gobernacion, pero nan kier mas transparencia y mas garantia cu Aruba no lo perde mas control financiero. “Nos no ta contra bon gobernacion, pero nos kier sa unda nos ta bay y con Aruba lo sali for di esaki,” de Freitas a comenta.

SUFICIENTE CAPACIDAD

Segun e, Aruba tin suficiente capacidad y alternativa pa sigui maneha su finansas sin sigui aumenta e debe. E la pone enfasis cu e pais mester enfoca mas riba economia local, turismo y desaroyo economico sostenibel. De Freitas tambe a expresa preocupacion cu, apesar di hopi promesanan y discusionnan politico tocante San Nicolas durante ultimo añanan, poco accion concreto a wordo tuma pa desaroya distrito. “Tur hende ta papia di San Nicolas, pero hopi tiki accion real a wordo tuma,” e la bisa. Durante e entrevista, de Freitas a subraya cu Aruba ta un isla bendiciona danki na su pueblo trahador y resiliente. Segun e, e fortaleza di economia local a wordo construi riba sacrificio di generacionnan cu a traha duro pa desaroya turismo y otro sector economico.

Na final di e conversacion, de Freitas a laga cla cu, segun su opinion y e opinion di diferente gremionan empresarial, Aruba mester pensa cuidadosamente prome cu acepta HOFA den forma cu actualmente ta wordo presenta. “Things ta okay manera nan ta awor. Laga nos sigui maneha nos mes situacion,” de Freitas a conclui.