KPA: Campaña pa entrega arma a produci apenas 3 arma debolbi

ORANJESTAD – Campaña nacional “Entreg’e of Nos ta Bin Busc’e”, organiza door di Cuerpo Policial Aruba (KPA) hunto cu Ministerio Publico, a yega na su final oficialmente. Awor, autoridadnan ta anuncia cu nan ta drenta den un fase nobo y mas duro den e combate contra posesion ilegal di arma di candela na Aruba.

Durante periodo entre 24 di maart 2026 y 24 di mei 2026, ciudadano tabatin oportunidad pa entrega arma ilegal, piesanan di arma y municion di forma completamente anonimo y sin riesgo di persecucion penal. Pa esaki, Gobierno a coloca containernan blauw especial na San Nicolas y Oranjestad.

Segun informacion oficial, durante e campaña a wordo entrega un total di tres arma di candela y 359 bala cayente. Entre e armanan tabatin un pistola Beretta 9mm, un Winchester 255 y un Colt .38. Tambe a deposita varios tipo di municion, incluyendo 332 bala di calibre .22.

Pero paralelamente cu e campaña voluntario, polis y Ministerio Publico a sigui intensifica investigacionnan y accionnan contra posesion ilegal di arma. Cifranan oficial ta mustra cu desde 1 di december 2025 te cu 29 di mei 2026, autoridadnan a detene 40 sospechoso y a confisca 13 arma di candela ilegal. Di e total aki, dos di e armanan tabata fabrica cu tecnologia di 3D printer.

Ministerio Publico tambe a confirma cu nueve sospechoso ya a ricibi castigo, mientras cu otronan ainda ta wardando pa nan caso wordo trata den corte.

Cuerpo Policial Aruba y Ministerio Publico a enfatisa claramente cu e oportunidad pa entrega arma ilegal boluntariamente awor a termina.