Temporada di horcan a cuminsa: DVG ta pidi comunidad pa prepara na tempo

ORANJESTAD – Cu inicio oficial di temporada di horcan awe, 1 di juni, Directie Volksgezondheid (DVG) ta haci un apelacion na comunidad pa tuma preparacion serio durante e temporada cu ta dura te cu 30 di november.

Aunque Aruba ta situa pafor di ruta principal di hopi horcan den Caribe, DVG ta alerta cu fenomeno natural por cambia direccion inesperadamente y ainda afecta nos region. Pa esey, preparacion temprano ta esencial pa proteha bida y limita daño durante calamidad.

DVG ta recomenda cu famianan revisa nan plan di emergencia, percura pa tin awa, cuminda y medicamentonan suficiente, y guarda documentonan importante den un lugar sigur. Tambe ta importante pa tur miembro di famia sa exactamente kiko nan mester haci den caso di emergencia.

Den colaboracion cu CMO, DVG a prepara diferente guia y informacion practico tocante horcan, terremoto, tsunami y incendio. E materialnan ta disponibel online pa yuda comunidad prepara nan mes mihor.

“Calamidad no ta avisa. E miho momento pa prepara ta prome cu emergencia yega,” DVG a enfatisa.

Pa mas informacion y guia di preparacion, ciudadano y residente por bishita website oficial di DVG of sigui nan plataforma social pa update oficial durante temporada di horcan.