Famoso abogado hulandes Geert-Jan Knoops castiga cu suspension condicional

AMSTERDAM – Famoso abogado hulandes Geert-Jan Knoops a ricibi un suspension condicional di cuatro siman door di Raad van Discipline na Amsterdam despues cu tribunal disciplinario a conclui cu el no a informa suficiente su cliente tocante riesgo di cambia declaracion den un caso penal. Knoops a fungi como abogado pa varios caso grandi na  Corsou y Boneiro den pasado recien. 

E caso tabata relaciona cu un empresario sospecha di abuso sexual na Francia. Segun e consejo disciplinario, Knoops no a confirma por escrito e consecuencia di cambia declaracion, algo cu por afecta credibilidad di sospechoso, specialmente den caso sexualnan.

Ademas di esey, Raad van Discipline a critica Knoops pa cobra suma “excesivo” na un caso relativamente chikito. Tribunal anteriormente a ordena cu el mester paga mas di un ton euro bek. Segun e informe, e abogado tampoco no a comunica claramente tocante gasto, ni a entrega overzicht di ora di trabou manera a wordo acorda.

Su esposa y colega, Carry Knoops-Hamburger, tambe a ricibi critica pa falta di transparencia financiero, aunque den su caso e castigo a keda limita na un reprimanda oficial.

E pareha di abogado ta conocido den Hulanda pa traha riba caso grandi y mediatico, incluyendo defensa di Marco Borsato y Inez Weski. Esaki ta e prome bez cu un medida disciplinario ta wordo imponi riba Knoops. Ambos banda ainda por bai apelacion contra e decision. 

CASO NA CORSOU Y BONEIRO

Knoops a wordo involvi den varios caso mediatico y controversial den Caribe Hulandes tambe, specialmente na Curaçao y Bonaire.

Hunto cu su casa, Carry Knoops-Hamburger, e la brinda defensa den e famoso Caso Rombley na Corsou. Den e caso aki, Vernond Rombley tabata condena pa asesinato, pero e ekipo di Knoops a argumenta cu tabatin serio duda tocante e condenacion y a busca revision di e caso via nan Innocence Project.

Na Boneiru, Knoops tambe a participa den e conocido Caso Spelonk, unda dos homber a wordo condena pa un doble asesinato. Despues di   investigacion largo y revision, e caso a bira un simbolo di posible error hudicial den Caribe Hulandes.

Otro caso grandi cu su nomber a wordo relaciona na dje ta Caso Zambezi, tambe na Boneiru, un investigacion amplio tocante trafico di droga y crimen organiza. Den e proceso, Knoops a representa sospechosonan den un di e operacionnan criminal mas grandi den region.

Ademas di e casonan mediatico aki, Knoops regularmente a ofrece asistencia legal den diferente caso penal grandi na Corsou, specialmente den asunto cu alegacion di error hudicial, problema cu evidencia forensico y peticion pa revision di condenacionnan.