Aduana ta modernisa sistema di carga aereo cu integracion di IATA Cargo-XML

ORANJESTAD – Departamento di Aduana a introduci oficialmente un modulo nobo di IATA Cargo-XML den e plataforma di ASYCUDAWorld, como parti di su esfuerzo continuo pa modernisa e maneho di carga aereo y fortalece controlnan na frontera di Aruba.

Riba 13 di mei 2026, Aduana, den colaboracion cu International Air Transport Association y United Nations Conference on Trade and Development, a organiza un seminario y workshop tocante e integracion nobo aki.

Cu e implementacion di IATA Cargo-XML, aerolineanan, express carriers y otro operadornan autorisa den cadena di suministro di carga aereo, lo por entrega informacion di manifiesto di carga electronicamente, siguiendonan e standardnan internacional reconoci pa IATA.

Segun Aduana, e mehoracion aki lo aumenta eficiencia, transparencia y confiabilidad den e proceso di carga aereo na Aruba. Autoridadnan aduanero lo ricibi informacion di carganan prome cu nan yega na isla, facilitando un proceso mas rapido di despacho di carga, mehor control di riesgo y mas seguridad na frontera.

E sistema nobo tambe ta reduci trabou manual y ta promove mas exactitud y consistencia den intercambio di informacion entre operadornan di carga y Aduana. A traves di ASYCUDAWorld, participante nan lo beneficia di un proceso completamente digitalisa y alinea cu e normanan global di industria.

Departamento di Aduana a indica cu e iniciativa aki ta confirma su compromiso cu transformacion digital, facilitacion di comercio y aplicacion di mihor practicanan internacional den administracion aduanero.

Aduana a agrega cu nan lo continua traha hunto cu stakeholdernan local y partnernan internacional pa sigura un implementacion exitoso y futuro expansion di e sistema.