Colombia a bai vota den medio di ola di violencia y tension politico

BOGOTA – Colombia a bai vota diadomingo pa scoge un presidente nobo, den medio di un situacion di violencia, atentadonan y inseguridad creciente den diferente region di e pais. Presidente actual Gustavo Petro no por participa atrobe, pasobra su periodo legal di cuatro aña a yega na su fin.

Den e encuestanan, Iván Cepeda di coalicion di robez Pacto Histórico ta liderando. Dos partido derechista tambe ta fuerte den e carrera electoral, incluyendo candidata centro-derechista Paloma Valencia, cu por bira e prome presidente muhe di Colombia. Candidato radical derechista Abelardo de la Espriella tambe ta ganando apoyo.

Seguridad y violencia ta e tema principal den e eleccion. Apesar cu Petro a promete “Paz Total”, buscando acuerdo cu grupo arma, Colombia ainda ta luchando cu cartelnan di droga y movimiento guerrillero cu ta controla parti di e pais.

Den regionnan manera Cauca, Valle del Cauca, Nariño y Norte de Santander, violencia a subi hopi prome cu e eleccion. Un luna pasa, un bus a explota riba autopista Pan-Americano den Cauca, causando 21 morto y decena di herido. Guerrilla EMC (Estado Mayor Central) a reclama responsabilidad pa e atentado.

Segun lider indigena Eduin Capaz di CRIC, e grupo guerrillero kier mustra cu nan ainda tin poder y cu cualkier presidente nobo lo mester conta cu nan. Cerca di dia di eleccion, atentadonan cu drone, explosivonan y amenaza contra candidatonan ta sosode casi tur dia.

Aña pasa, candidato presidencial derechista Miguel Uribe Turbay a wordo asesina, mientras cu e candidata pa vicepresidencia di Pacto Histórico, Aida Quilcué, a wordo secuestra e aña aki.

Violencia den Colombia tin rais profundo despues di mas cu 50 aña di guerra civil entre gobierno y guerrillanan di FARC. Aunke un acuerdo di paz a wordo firma na 2016, diferente grupo disidente a sigui combati, incluyendo EMC, cu awor ta un di e grupo mas poderoso.

Pa gana eleccion, un candidato mester logra mayoria absoluto di votonan. Si ningun candidato no logra esey, lo tin un di dos ronda electoral riba 21 di juni.