Wardacosta ta alerta pa laman bruto y biento fuerte durante fin di siman pa islanan ABC

ORANJESTAD – Cu fin di siman acercando, autoridadnan (Wardacosta) a haci un yamado urgente diabierna atardi na comunidad di Aruba, Corsou y Boneiru pa tuma precaucion extra debi na condicionnan peligroso di laman y tempo den e dianan cu ta bin.

Segun e advertencia, corientenan fuerte, ola halto y bientonan duro por crea situacionnan peligroso pa hende cu ta bay laman, landa of sali cu boto. Pa e motibo ey, autoridadnan ta recomendando pa evita riesgo innecesario y sigui constantemente e actualisacionnan oficial di tempo y laman di instancianan competente manera Meteo Aruba y otro servicio meteorologico local.

Tambe ta wordo aconseha pa no landa ni sali cu boto, excepto si realmente ta necesario. Pa esnan cu mester sali riba laman, autoridadnan ta enfatisa importancia di controla cu e embarcacion ta den bon estado y cu tur equipo di seguridad obligatorio ta presente abordo.

Entre e medidanan recomenda tin uso di chaleco salbabida, carga di documento valido abordo y informa un familiar of conocido riba e ruta cu lo wordo tuma y e hora estima di regreso.

Autoridadnan ta recorda cu seguridad personal y esun di otro usuario di laman semper mester bira prioridad principal. Den caso di emergencia, comunidad ta wordo pidi pa contacta numbero di emergencia 913 inmediatamente.