Eric van der Burg: Aruba ta completamente autonomo den decision riba HOFA

ORANJESTAD – Secretario di estado hulandes pa Asuntonan di Reino, Eric van der Burg, a declara diabierna mainta durante un conferencia di prensa, cu Aruba ta sigui un pais completamente igual y autonomo den Reino Hulandes, y cu finalmente Parlamento di Aruba lo tin e ultimo palabra tocante e ley HOFA. Esaki sinembargo, no por wordo mira como un disculpa, manera cu e mandatario a bisa despues na e periodista Tito Laclé di Noticiacla, durante e session di pregunta cu a sigui.  

E DISCUSION ANDANDO

Durante e conferencia, unda periodista Laclé di Noticiacla tabata presente, Eric van der Burg a referi na e discusion cu a surgi despues di un entrevista cu el a duna recientemente tocante Status Aparte di Aruba. “Loke mi ta bisa desde dia uno cu mi a bira secretario di estado, ta cu nos tin cuater pais den Reino y e cuater paisnan ta completamente igual na otro. No ta un mama cu tres ruman muhe. Nos ta cuatro ruman cu ta para hunto riba base igual,” segun vd Burg.

IMPORTANCIA DI STATUS APARTE 

E la enfatisa cu esaki no ta kita nada di importancia di Status Aparte di Aruba, cual recientemente e mes a celebra hunto cu Rey Willem-Alexander durante e conmemoracion di 40 aña di Status Aparte. Segun vd Burg, desde 10-10-10 Aruba, Corsou, Sint Maarten y Hulanda ta forma e cuatro paisnan igual den Reino, despues cu Antillas Hulandes a caba di existi. E secretario di estado tambe a papia ampliamente tocante HOFA, e Ley di Financiamiento Gubernamental di Aruba. Segun e, e ley ta un “consensusrijkswet”, loke significa cu tur cuatro gabinete den Reino mester aproba esaki prome cu e por sigui. “ Parlamento Hulandes lo dicidi riba Rijkswet, pero Parlamento di Aruba tambe mester aproba un landsverordening. Si Aruba no aproba esaki, e Rijkswet no por drenta na vigor,” vd Burg a splica. Segun e, HOFA lo permiti Aruba presta placa na mes tarifa barata cu Corsou y Sint Maarten, usando e mes bentaha financiero cu Hulanda tin riba mercado internacional. “Tin hopi confusion na Aruba manera cu Hulanda por dicidi esaki su so. Mi kier ta hopi cla: Hulanda no por haci esaki su so. Finalmente ta Parlamento di Aruba cu ta dicidi si e ley lo sigui of no,” segun Eric van der Burg. E la agrega cu e proceso originalmente a cuminza durante gobierno anterior di Evelyn Wever-Croes y cu awor a continua bou di gobierno di Mike Eman. “E no ta afecta autonomia di Aruba den ningun forma,” vd Burg a conclui.