Aruba posiblemente lo procesa desperdicio pa Corsou y Boneiru

DEN HAAG – Aruba ta investiga hunto cu Boneiru y posiblemente Corsou e posibilidad pa maneha y procesa desperdicio conhuntamente den Caribe Hulandes. Asina e portal aruba.nu ta raporta. Segun e portal, e discusion a surge durante un debate den Tweede Kamer tocante e problemanan creciente di desperdicio na Boneiru.

Segun e portal, secretario di estado pa asuntonan di Reino, Eric van der Burg a confirma cu Aruba a trece e tema di “waste management” dilanti durante ‘overleg’ cu Comision Europeo, incluyendo colaboracion regional entre e islanan. Segun e, Prome Minister Mike Eman ta habri pa cooperacion.

E debate a enfoca specialmente riba e situacion problematico di desperdicio Selibon na Boneiru, unda tin preocupacion riba salud publico, peligro di candela y maneho di desperdicio.

Durante e encuentro, GroenLinks-PvdA a propone cu e islanan ABC mester busca solucionnan conhunto pa procesamiento di desperdicio.

Segun Eric van der Burg, ya a tuma algun paso na Boneiru, manera mihor almacenamento di desperdicio medico y controlnan mas estricto. Sinembargo, e la reconoce cu procesa y exporta desperdicio ta sigui caro pa motibo di posicion geografico di e islanan.

Tambe a discuti e crecimiento rapido di poblacion na Boneiru y e presion cu esaki ta pone riba infraestructura y facilidadnan publico. Gobierno hulandes lo presenta despues di zomer un plan pa inverti 30 miyon euro den Caribe Hulandes pa infrastructura, seguridad di existencia y fortalecimiento economico.