Investigacion: Muchanan cu no uza telefoon ta drumi mihor y tin menos depression

AMSTERDAM - Un investigacion grandi entre decenan di mil hoben na Austria a revela cu muchanan y adolescente cu laga nan telefoon na un banda pa tres siman a experimenta mihor soño, menos sintomanan depresivo y un mehor bienestar mental.

E estudio, cu a conta cu apoyo di Ministerio di Educacion di Austria y cadena publico ORF, tabata sigui un investigacion chikito di aña pasa unda 69 adolescente a pasa 21 dia sin smartphone ni social media. Ya na e momento ey a wordo nota un mehoracion fuerte den salud mental.

Awor, casi 46 mil mucha y hoben di mas cu 600 scol na Alemania, Austria y Suisa a participa den e investigacion grandi. Prome cu e experimento a cuminsa, hopi participante a declara cu nan tabatin problema di soño, sintomanan depresivo y uso excesivo di internet.

Despues di pasa tres siman sin telefoon, resultadonan a mustra cu 23% di e participantenan a logra drumi mas rapido y a haya menos problema pa sigui drumi durante anochi. Tambe e muchanan cu tabatin problema serio di soño a mira mehoracion.

Riba nivel mental, investigadornan a nota cu bienestar psicologico a mehora cu 18% di e participantenan. Ademas, cantidad di hoben cu no tabatin sintomanan depresivo despues di e experimento a subi cu 15%, especialmente entre muchanan muhe.

Tambe a mira un reduccion den uso problematico di internet. Apesar cu algun hoben a admiti cu nan a sinti nan mes laf den comienzo, hopinan rapidamente a busca otro actividadnan pa ocupa nan tempo, manera bay pafor mas, lesa, crea musica of participa den otro hobby.

Segun investigadornan, e cantidad di participantenan cu a completa e experimento tabata excepcionalmente halto. Mayor parte di e participantenan cu a laga e estudio a haci esey riba prome dia.

E investigacion ta bin den momento cu diferente paisnan ta considera medida pa limita uso di social media entre muchanan. Austria tin plan pa limita social media pa muchanan bou di 14 aña for di 2027. Na Australia ya tin un prohibicion pa muchanan bou di 16 aña uza social media, mientras cu den Hulanda apoyo pa medida similar tambe ta creciendo.