Gobierno ta asigna mas cu 52 miyon florin pa DOW den presupuesto di 2026

ORANJESTAD – Gobierno di Aruba lo destina mas cu 52 miyon florin e aña aki pa Departamento di Obras Publico (DOW). Esaki ta sali  for di e presupuesto oficial recientemente publica den Afkondigingsblad di Aruba. 

Segun e documento, e parti mas grandi di e presupuesto lo bay pa gasto operacional. Casi 35 miyon florin a wordo reserva exclusivamente pa compra di producto y servicio necesario pa funcionamiento diario di DOW.

Ademas, mas cu 13,4 miyon florin lo wordo uza pa gastonan di personal, mientras cu cerca di 3,7 miyon florin ta destina pa contribucionnan patronal.

Loke ta destaca den e presupuesto ta cu practicamente no tin inversionnan nobo inclui. Tanto pa propiedadnan inmobel como pa ekiponan y otro biennan movibel, no a reserva ningun cantidad nobo pa inversion. Solamente un suma limita di 34.800 florin ta inclui pa pago di aflossingnan.

E presupuesto tambe ta mustra cu DOW ta sigui altamente dependiente di aporte financiero di gobierno. Di e entrada total, mas cu 50,5 miyon florin ta bin for di empresanan y fondonan di gobierno.

Entrada propio for di permitnan, derecho y otro ingreso ta relativamente limita, y ta suma aproximadamente 1,5 miyon florin.