Republica Dominicana ta supera Aruba y den turismo sigur, segun investigacion internacional

PUNTA CANA/ORANJESTAD – Un investigacion nobo di Travel And Tour World (TTW) ta indica cu cada biaha mas turista internacional ta  scoge destinacionnan cu mas siguridad, menos criminalidad y mihor proteccion pa bishitantenan, algo cu ta beneficia Republica Dominicana y otro paisnan den region.

Segun e informe “2026 Safety Index”, turistanan for di Merca, Canada, Mexico, Spaña y China awor ta pone mas enfoke riba seguridad, acceso na cuido medico, transportacion confiabel y presencia visibel di polis turistico, en bes di solamente lujo y beach resortnan.

E investigacion ta menciona cu Republica Dominicana ta creciendo rapidamente den mercado turistico door di inversionnan den infrastructura aeroportuario, seguridad den resortnan y sistema di emergencia den area nan manera Punta Cana, Cap Cana y La Romana.

Aruba tambe a wordo menciona den e informe como un destinacion cu ta sigui atrayendo turista pa motibo di stabilidad, bon gobernacion y sistema turistico organiza. Segun TTW, Aruba ta combina infrastructura moderno cu seguridad visibel y mihor maneho turistico compara cu hopi otro destinacionnan competidor.

E informe ta destaca cu turistanan actualmente ta busca destinacionnan cu “predictabilidad, seguridad y conveniencia”, specialmente den un mundo unda conflicto global y preocupacionnan di seguridad ta sigui aumentando.

TTW tambe a señala cu diferente paisnan den Caribe y Latinoamerica ta mantene un “Level 1 travel advisory”, indicando cu riesgo pa turista y biahero di negoshi ta relativamente abou.

Ademas, e investigacion ta subraya cu inversionnan den polis turistico, programa di proteccion pa bishitante y sistema di seguridad den aeropuerto y hotelnan ta bira factor decisivo pa turista nan ora nan ta scoge unda pa pasa vakantie.