Polis ta busca “Kuki” den investigacion di asesinato na Palm Beach

ORANJESTAD – Cuerpo Policial Aruba y Ministerio Publico a lansa un yamado urgente na comunidad pa yuda den localisacion di Li-Angelo Robert Rayshen Carmona Alcantara, conoce tambe bou di e alias “Kuki”, kende ta wordo busca den conexion cu e tiroteo fatal cu a sacudi Palm Beach durante marduga diadomingo 24 di mei 2026.

E incidente a tuma luga den parkeerplaats di The Village, cerca di Fat Tuesday, unda un homber a perde su bida despues di a wordo alcanza pa varios tiro. E caso a causa hopi conmocion den comunidad y den area turistico di Palm Beach, especialmente pa motibo cu e hecho sangriento a sosode den un area frecuenta hopi pa turista y localnan.

Segun informacion oficial comparti door di autoridadnan, Li-Angelo Robert Rayshen Carmona Alcantara, naci na Aruba dia 26 di october 2007, ta wordo considera sospechoso den e caso di homicidio.

Recherche y Ministerio Publico ta sigui trahando intensamente riba e investigacion, mientras polis ta pidi comunidad pa comparte cualkier informacion cu por yuda den localisa e sospechoso.

Autoridadnan a haci un apelacion urgente na cualkier persona cu a mira algo sospechoso, tin informacion of sa unda e sospechoso por ta, pa tuma contacto inmediato cu tipline di polis na 11141. Polis a enfatisa cu tur informacion lo wordo trata confidencialmente y cu informantenan por keda completamente anonimo.