Profesor Elzinga: HOFA por limita autonomia di Aruba pa hopi aña

ORANJESTAD – Profesor y experto constitucional hulandes, Douwe Jan Elzinga, a lansa critica fuerte riba e propuesta di Consensusrijkswet HOFA (Houdbare Overheidsfinanciën Aruba), argumentando cu e sistema di supervision financiero propone pa Aruba tin “grandi defecto constitucional” y por resulta den un limitacion serio di autonomia di Aruba pa hopi añanan. Ta bon pa nota cu Prof. Elzinga ta di acuerdo cu e opinion reciente di Raad van Advies cu e obligacion pa presenta cambionan den legislacion local na Rijksministerraad ta contra di constitucion di Aruba.

ANALISIS EXTENSO

Den su analisis extenso, Elzinga ta cuestiona tanto e procedimiento como e contenido di e ley. Segun e, e forma con consensusrijkswetten ta wordo maneha dentro di Reino Hulandes ta crea confusion constitucional y ta permiti cu Hulanda haya influencia creciente riba asuntonan cu, segun Statuut, mester keda competencia autonomo di Aruba.

CONSENSO

Elzinga ta bisa cu, den practica, e “consenso” entre Hulanda y paisnan caribense no semper ta realmente boluntario. “Slikken of stikken,” e profesor a describi e relacion, indicando cu Aruba ta wordo pusha pa acepta supervision financiero debi na beneficio financiero y tasanan di interes mas favorable cu Hulanda ta ofrece.

SUPERVISION FINANCIERO TEMPORAL 

Segun e experto, un di e mayor preocupacionnan ta cu e supervision financiero, presenta como “temporal”, posiblemente no lo ta temporal realmente. Elzinga ta alerta cu, aun si Aruba logra cumpli cu e normanan financiero den algun aña, ainda tin riesgo cu supervision di Reino ta sigui activo pasobra Hulanda lo sigui controla e decisionnan principal.

PRECEDENTE PELIGROSO

E profesor tambe ta argumenta cu e propuesta por crea un precedente peligroso pa futuro, unda Hulanda por usa consensusrijkswetten pa haya mas control riba otro aspecto di autonomia di paisnan caribense den Reino. Segun  e, esaki por “hollow out” e autoridad di gobierno y Parlamento di Aruba poco poco.

TAREA DI RIJKSMINISTERRAAD 

Un otro punto central den su critica ta e rol cu Rijksministerraad lo haya den aprobacion di cambionan na legislacion financiero di Aruba. Elzinga ta sostene cu e influencia directo aki no ta cuadra cu Constitucion di Aruba y cu un cambio asina, segun e reglamento constitucional actual, lo mester apoyo di dos tercera parti di Parlamento y no simplemente un mayoria normal.

REEVALUA FIGURA DI CONSENSUS RIJKSWET

Finalmente, Elzinga ta conclui cu Reino Hulandes mester reevalua  e figura di “consensusrijkswet” profundamente,  pasobra segun e, e sistema actual ta mezcla autonomia y control di un manera cu ta crea “un warboel constitucional”. E la bisa cu Aruba mester analiza   e consecuencia di largo plazo p cuidadosamente prome cu acepta e sistema HOFA den su forma actual.