Laclé: “Menos comunicacion ta crea mas rumor y paranoia den comunidad”

ORANJESTAD – Presidente di sindicato di polis SPA, Lito Laclé, a comparti durante un entrevista den e programa Noticiacla LIVE cu comunicacion entre autoridadnan y comunidad ta esencial pa mantene calma y confianza, especialmente durante investigacionnan criminal grandi.

FALTA DI COMUNICACION

Den conversacion cu periodista Tito Laclé, presidente di SPA a indica cu ora autoridadnan no ta comunica suficiente cu pueblo, automaticamente tin espacio pa rumor, especulacion y paranoia crece. “Menos bo comunica cu comunidad, mas bo ta crea espacio pa hende nan mes crea informacion,” Laclé a declara.

COMUNIDAD KIER CLARIDAD

Segun e, den casonan serio unda tin arestonan of investigacionnan activo, comunidad ta busca claridad y siguransa cu autoridadnan tin control riba situacion. E la menciona cu hopi biaha hende ta tende informacion via diferente medio, pero no necesariamente via comunicacion oficial di polis. “Pueblo kier tende cu, por ehemplo, dos sospechoso a wordo detene y falta un mas, pa nan por sinti cu investigacion ta bay den bon direccion,” e la bisa. No obstante, Laclé a aclara cu den investigacion penalnan, e responsabilidad principal di comunicacion no ta directamente den man di polis, sino den man di Ministerio Publico. “Ora tin un investigacion penal andando, polis ta ehecuta su trabou, pero fiscal ta asumi liderazgo di investigacion. Tur loke ta envolvi investigacion penal, Ministerio Publico mester encarga cu esey,” Laclé a splica.

COMUNICACION STRATEGICO

Apesar di esey, presidente di SPA ta di opinion cu comunicacion strategico y mas frecuente por yuda calma comunidad y sector turistico, especialmente den area di hotelnan High Rise, unda preocupacion y incertidumbre por surgi rapidamente despues di incidente serio. “Comunicacion mester wordo pensa mas pa mitiga paranoia cu ta existi den hotelnan y comunidad. Pueblo kier tende cu autoridadnan ta trahando bon y cu investigacion ta casi cla,” el a expresa. Laclé a enfatisa cu esey no solamente ta importante pa habitantenan local, pero tambe pa turista nan cu ta bishita Aruba y cu kier sinti nan mes seguro riba isla. “Nos mester calma no solamente localnan, pero tambe turistanan,” presidente di SPA a conclui durante e entrevista den Noticiacla LIVE.