Lito Laclé(SPA): “No ta sano cu polisnan ta traha overtime constantemente mientras otronan ta cu vakantie”

ORANJESTAD – Presidente di sindicato di polis SPA, Lito Laclé, a comparti preocupacion serio tocante escasez di personal dentro di Cuerpo Policial Aruba durante un entrevista cu periodista Tito Laclé den e programa Noticiacla LIVE.

PRESION GRANDI

Segun Laclé, e situacion actual den diferente distrito policial ta pone presion grandi riba polisnan cu ta activo den servicio diario. E la splica cu, den circumstancianan normal, cada distrito mester tabatin minimo cinco te seis polisnan pa cubri servicio, pero actualmente tin ploegnan cu solamente tin uno, dos of tres colega trahando.

TRABOU EXCESIVO

Presidente di SPA a enfatisa cu e carga di trabou excesivo no solamente ta afecta e polisnan mes, pero tambe nan bida familiar y bienestar personal. “Bo mester para cu e situacion unda na final di luna casi tur colega mester traha overtime, mientras un parti no tin dia liber y otronan ta cu vakantie. Esey no ta sano pa e colega ni pa su famia,” e la declara.

ESCASES GRANDI

Laclé tambe a revela cu situacion den departamento di reserva ta preocupa hopi. Actualmente, Aruba tin solamente 18 polis di reserva activo, mientras oficialmente lo mester tabatin aproximadamente 47. “Nos tin un tekort di mas o menos 63%,” e la bisa.

NADA NOBO

Segun Laclé, e problema no ta algo nobo, pero e situacion awor ta haciendo alarma sona mas fuerte dentro di organizacion. El a indica cu sindicato y equipo di comando mester traha hunto pa encontra solucion rapido.

PRIORIDAD

“Nos mester wak unda prioridad ta. Tin cierto team mester stop di insisti y bolbe traha den reserva of servicio regular pa nos por tin suficiente hende pa cubri turismo y pa pueblo sigui sinti nan mes seguro riba isla y den bario nan di Aruba,” Laclé a conclui.