Polis ta reparti 111 boet durante control di trafico na Oranjestad

ORANJESTAD – Polis di districto Oranjestad, hunto cu Unidad Motorisa, a tene diferente control di trafico durante oranan di atardi y anochi di diahuebs 21 di mei 2026 den varios punto strategico di Oranjestad.

Durante e operacion, autoridadnan a reparti un total di 111 boet pa diferente infraccionnan di trafico. Ademas, un persona a wordo detene pa maneha un vehiculo sin un rijbewijs valido.

Entre e infraccionnan detecta tabatin falta di rijbewijs, keuringskaart no na ordo, impuesto di vehiculo no paga, falta di seguro valido, no uza safety belt, luznan defecto y no usa señal di direccion.

Cuerpo Policial Aruba a enfatisa cu e controlnan di trafico lo continua tuma luga regularmente y a haci un yamada na tur automobilistanan pa tene documentonan di vehiculo na ordo y cumpli cu reglanan di trafico.

Segun polis, un trafico sigur ta responsabilidad di tur ciudadano.