Yiu di fundador di Mango ta laga su cargo temporalmente den investigacion tocante morto di su tata

MADRID – Jonathan Andic, yiu di fundador fallecido di cadena di moda Mango, Isak Andic, a laga  su puesto como vice-presidente di compania temporalmente mientras cu autoridadnan na Spaña ta investiga su posible participacion den morto di su tata.

Jonathan Andic, di 45 aña, ta sospecha den investigacion despues cu su tata Isak Andic a muri na 2024 despues di un caida di mas cu 100 meter for di un baranca durante un caminata na Barcelona. Na principio, e morto tabata wordo mira como un accidente, pero despues autoridadnan a cuminsa investiga e caso como posible asesinato debido na inconsistencia den declaracionnan.

Segun fiscalia spaño, Jonathan lo a actua motiva pa su “obsesion cu placa”, despues cu e la descubri cu su tata kier a cambia su testamento pa dedica parti di su fortuna na un fundacion pa yuda hende den necesidad.

Jonathan ta rechasa e acusacionnan y ta bisa cu nan ta “sin base” y cu e eventonan a wordo presenta fuera di contexto. Den un carta na personal di Mango, e la splica cu e atencion y defensa legal cu e caso ta exigi no ta permiti’e sigui ehecuta su funcion den compania.

Despues di paga un fianza di 1 miyon euro, autoridadnan a libera Jonathan mesun dia. Sinembargo, su pasaporte a wordo confiscá, e no por laga Spaña y mester presenta semanalmente na corte. Su famia ta insiste cu e ta inocente.