Emotivo anochi cultural honra legado di Ito Tromp na Arubiana-Caribiana

ORANJESTAD – Den sala principal di Arubiana-Caribiana na Bachstraat, a tuma lugar un anochi cultural  special bou titulo “Conversatorio Ito Tromp: Duna Mi Dos Placa di Palabra”, dedica na legado di Ito Tromp. (bibliotecanacional.aw)

Durante e anochi, Ito Tromp, di 87 aña, a comparti reflexionnan y memoria tocante diferente etapa importante di su bida y su enorme contribucion na cultura, historia y idioma papiamento di Aruba. E actividad a wordo conduci door di Zetsia Ponson y Renwick Heronimo.

A dedica atencion especial na mas cu 40 aña di Ito na radio cu programanan famoso manera “Butishi di Alegria” y e quiz “Scucha, Pensa y Contesta”. Tambe a destaca su trabou na DCA, Radio Nederland Wereld Omroep y su entrevistanan cu reconocidonan personalidadnan arubiano.

Diferente personahenan local y miembro di comunidad a asisti pa honra y expresa nan aprecio pa Ito Tromp, entre nan parlamentario Xiomara Maduro, Luc Alofs y otro invitadonan.