Tiramento fatal na Palm Beach ta cobra bida di hoben di 17 aña

PALM BEACH – Un caso serio di violencia a tuma luga den marduga di diadomingo na un parkeerplaats na Palm Beach, unda un hoben di apenas 17 aña a perde su bida despues di wordo alcanza pa un tiro fatal.

Pa mas o menos 1:18 di marduga, central di polis a ricibi un yamada di emergencia cu na parkeerplaats di e establecimento Fat Tuesday ,tabatin un mucha homber cu lo a wordo tira y cu no tabata reaccionando. Polis y ambulance a wordo manda inmediatamente cu urgencia pa e lugar.

Ora polis a yega, nan a topa cu e victima sin señal di bida. Personal di ambulance a haci tur esfuerso pa salba su bida, pero lamentablemente no tabatin nada mas cu nan por a haci y e hoben a wordo declara morto na e lugar.

Miembronan di Recherche y polis technico a presenta pa cuminsa cu un investigacion amplio tocante e tiramento.. Departamento di slachtofferhulp a brinda sosten na famia y sernanan afecta door di e tragedia.

Mas despues, famia a reconoce e victima como Rayden K.A. Kock, naci na Aruba riba 3 di juli 2008. E hoben tabatin solamente 17 aña di edad.

Autoridad policial ta haci un apelacion na cualkier persona cu por tin informacion of cu a mira algo sospechoso durante e incidente pa contacta e tipline di polis riba number 11141. Polis a enfatisa cu personanan lo keda completamente anonimo.Noticiacla ta expresa palabra di condolencia na famia di e fayecido