Jetten: Hulanda y Aruba lo uni pa miho redesaroya tereno di refineria

ORANJESTAD  – Prome minister di Hulanda, Rob Jetten, a bisa diamars anochi den Cocolishi cu Hulanda ta mira cu bon wowo e decision di Aruba pa redevelop e tereno di e refineria. Durante su declaracion na prensa hunto cu prome minister Mike Eman, Jetten a expresa cu e area tin potencial pa yuda fortalece economia di Aruba y crea oportunidadnan nobo pa futuro.

“Naturalmente Aruba ta un destinacion turistico fuerte, pero ta importante tambe cu economia sigui diversifica pa crea oportunidadnan nobo pa hende comun di Aruba,” Jetten a declara. E mandatario hulandes a bisa cu Hulanda ta haya cu Aruba a tuma un decision “sabio y impresionante” pa redevelop e tereno di e refineria.

Segun Jetten, Hulanda y Aruba a acorda tambe pa traha hunto den e proceso pa mira con e redevelopment por wordo maneha di e mihor forma posible den e añanan cu ta bin.

Durante su discurso, Jetten a gradici prome minister Mike Eman y su esposa pa e recibimento caloroso cu e la haya na aeropuerto. E la bisa cu ta hopi special pa bolbe Aruba despues di algun aña y haya oportunidad pa mira cu su propio wowonan e desaroyo di e isla y e potencial cu ainda tin pa futuro.

E mandatario hulandes a felicita Aruba y pueblo arubiano tambe cu e aniversario especial cu recientemente a wordo celebra. E la recorda cu un di e prome cosnan cu e la haci como prome minister tabata scirbi un prologo pa e buki di aniversario di Status Aparte. Segun e, ora cu bo mira Aruba for di oficina di e prome minister, ta cla cu e exitonan di e isla den e ultimo decenionan ta mustra impacto grandi cu Status Aparte tabatin riba Aruba y su pueblo.

Jetten a reconoce tambe cu mundo actualmente ta enfrenta hopi tension geopolitico y cu esey ta crea desafio grandi pa Reino Hulandes y tambe pa Aruba. E la enfatisa cu Hulanda y Aruba lo sigui para “schouder aan schouder” — schouder cu schouder — pa sigura seguridad y apoyo mutuo den momento di crisis.

Ademas, Jetten a anuncia cu Hulanda kier fortalece cooperacion cu Aruba, Corsou y Sint Maarten riba tema importante manera seguridad, resistencia y estado di derecho. E la menciona cu den futuro cercano lo tin varios combersacion y un conferencia di Reino pa sigui duna forma concreto na e cooperacion aki.

“Nos ta un Reino, we are one Kingdom, we zijn één Koninkrijk,” Jetten a conclui den su discurso.