Alarma pa Aruba: falta di tecnologia moderno ta pone salud di planta y siguridad alimentario na riesgo

ORANJESTAD – Den ocasioon di Dia Internacional di Salud di Planta, expertonan ta adverti cu Aruba no ta suficientemente prepara pa combati plaganan y malesanan vegetal cu por afecta produccion di cuminda, biodiversidad y siguridad alimentario di e isla.

E punto crucial di e comunicado ta cu Aruba ainda ta depende mayormente riba inspeccion visual y control basico di documento pa producto agricola importa, algo cu segun expertonan no ta suficiente pa evita entrada di plaganan peligroso y fungi cu por causa daño grandi na cultivacion local.

Nan a menciona como ehemplo e invasion di “Red Palm Weevil” na 2009, cu a entra na Aruba via palma importa pa hotelnan, causando daño na hopi palma den area publico y privado. Tambe ta existi preocupacion cu cultivacionnan manera banana, bacoba, maishi y fruta local por wordo afecta pa fungi y bacteria.

Segun e comunicado, cambio climatico y comercio internacional ta aumenta e riesgo di propagacion di plaganan. Pa esey, nan ta pidi implementacion urgente di tecnologia moderno manera drones, sensor digital, intelligencia artificial y sistema automatisa di control fitosanitario.

E comunicado ta critica tambe cu tanto Aduana como Departamento di Santa Rosa no tin e tecnologia necesario pa maneha biosiguridad vegetal moderno. Ademas, nan ta lamenta cu den e plannan pa Agri Innovation Park no a inclui suficiente enfoke riba biosiguridad vegetal.

Expertonan ta bisa cu proteccion di salud di planta ta esencial paso plantanan ta produci 80% di nos alimento y gran parti di e oxigeno cu hende ta respira.