Aruba Birdlife Conservation cu caso contra destruccion di naturaleza pa UTV y ATV

ORANJESTAD –  ORANJESTAD – Aruba Birdlife Conservation a inicia un caso sumario urgente contra gobierno di Aruba y Aruba Conservation Foundation (Parke Arikok) pa busca mas proteccion pa areanan natural contra destruccion causa pa UTV y ATV.

Segun e organisacion, e caso sumario ta enfoca riba areanan manera California Dunes, Tera Cora, Saliña Tierra del Sol, Western Wetlands, un gran parti di costa noord y seccionnan di Arikok National Park y Tres Trapi. ABC ta argumenta cu e areanan aki ta proteha bou di ROPV, pero cu den practica no tin suficiente control ni cumplimiento di ley, convirtiendo e regionnan den un tipo di “Wild West” pa vehiculonan off-road.

MORTO DI TURISTA RIBA UTV

E caso sumario ta bin den un momento cu discusion tocante seguridad y impacto ambiental di UTV y ATV ta aumentando na Aruba. Siman pasa ainda, un turista Mericano di 39 aña a perde bida despues cu su UTV a bolter cerca di Black Stone Beach na costa noord di Aruba. Autoridadnan a confirma cu e accidente fatal a tuma lugar den un area dificil di accesa y a crea preocupacion renoba tocante uso di e vehiculonan aki den tereno peligroso.

Aruba Birdlife Conservation ta bisa cu apesar di diferente peticion pa autoridadnan actua, poco a cambia den practica. Pa motibo ey, organisacion a recurri na corte pa solicita cu gobierno y autoridadnan responsable wordo obliga pa implementa medida concreto pa proteha naturaleza y controla mihor uso di UTV y ATV den areanan vulnerabel.