Kiwanis Palm Beach a celebra reunion anual y aproba directiva nobo

EAGLE BEACH – Kiwanis Club of Palm Beach Aruba a celebra su reunion anual diahuebs 7 di mei na La Cabana Beach Resort and Casino, unda cu e espiritu di hermandad dentro di e club a keda refleja un biaha mas.

Segun e comunicado oficial, e reunion anual a sigui e tradicion y estatutonan di Kiwanis International y di e club local, cu dos punto principal riba agenda. Durante e reunion, IPP Ross Brezovar a presenta con inteligencia artificial (AI) por yuda den trabou diario, mientras cu LG Rothmar Coenraad a comparti algun di e puntonan mas importante for di District Convention cu a wordo tene recientemente na Toronto, Canada.

Ademas, e miembronan presente a aproba e directiva nobo pa aña Kiwanistico 2026-2027. Segun e comunicado, e proceso di seleccion no tabata facil, y Patrick Melchiors, presidente di comision di eleccion, a explica con e proceso di nominacion a wordo conduci y e importancia di un eleccion transparente. Finalmente, e directiva nobo a wordo aproba “by acclamation”, cu ta significa cu tur miembro presente a vota na favor di e equipo presenta.

E directiva nobo lo consisti di Michel Frank como Immediate Past President, Christopher Robles como President, Roël Gomez como Incoming President, Glennrick Ridderstap como Vice President, Joshua Arrindell como Treasurer y Rodney Kock como Secretary. Tambe lo tin Rothmar Coenraad, Jomar Benschop, Navin Gangaram Panday, Giandric Tromp, Randolph Ruiz, Dennis Evers y Paul Seute como directors pa e periodo 2026-2027.

Kiwanis Palm Beach ta forma parti di Kiwanis International, un organizacion mundial di caracter caritativo dedica na mehora comunidadnan pa medio di apoyo na muchanan rond mundo.