Huez a trata caso di prohicion di e-steps riba caminda publico, den corte

ORANJESTAD – Gobierno no por djis yega, y kita e-steps y e-bikes for di caminda sin mas. Y huez mester prohibi gobierno pa e paso aki y si gobierno no cumpli, e mester paga un multa. Esaki ta e peticion den liña grandi, diabierna mainta ora cu abogado di e dos companianan cu a hiba gobierno corte, Evikes y Friendly Green Bikes. Gobierno su representante (DWJZ) a argumenta cu e ‘rotzooi’ aki mester termina y cu e situacion no por sigui asina y lo para ariba pa huez prohibi e dos companianan di sigui opera cu nan aparatonan riba caminda publico. 

HUEZ SU INTERMEDIACION

Huez for di comienso tabata kiuer clarificacion con e prohibicion abrupto a tuma lugar, di parti di gobierno pa e dos companianan. Y cu si ta berdad cu ta ‘djis’ pa medio di un conferencia di prensa y un ‘ultimo aviso’ riba Facebook, esaki a tuma lugar. Huez a mustra cu ora cu tabatin un tolerancia di un maneho (of falta di uno),  ta normal cu e partido cu kier trece cambio, (gobierno den e caso aki), ta manda un notificacion na e partidonan specifico, y ta duna nan un tempo pa cumpli cu esaki. Algo cu no a sosode den e caso aki. Argumento di gobierno tabata cu te ora cu e companianan a bay huez pa un medida temporal, cu nan (gobierno) no tabata na altura mes ken tabata bezig. Contra argumento tabata cu den pasado un di e companianan a haya un precario, y cu a papia cu gobernantenan di e gabinete anterior, pero cu nunca mas a tende di nan. E otro compania a sigura cu nan a haci peticion pa tanto permiso, como permiso pa nummerplaat pa e vehiculonan en cuestion, pero cu nunca no a haya nan. Ademas, e compania ta registra na Camara di Comercio y tin mas negoshi riba e isla. 

NO TIN PERMISO Y NO A PAGA

Gobierno a contra aresta cu di e dos companianan, uno tin un debe habri di 25 mil florin na placa di precario cu e no paga nunca, y pues no tin un precario valido pa ‘opera’ e negoshi. Pa loke ta e otro compania, nan lo a haci multiple peticion, pero no a haya nunca un permiso. Pues nan ta opera sin permiso. Uno ta operando illegal desde 2017 y e otro desde 2019. Uno cu un precario venci y e otro sin nada mes. E abogado di gobierno a yama esaki pues un ‘mundo riba su cabez’.  Ademas, segun gobierno su defensa, nan ta basa nan mes riba e regla di trafico wegverkeer y persoonsvervoer. Usando e dos leynan aki so, gobierno tin suficiente base pa a actua manera cu nan a haci, segun e defensa di gobierno. Ademas, mustrando huez potret di situacionan imposibel cu ta wordo crea, manera un hoben riba un e-step coriendo cu un baby, y mas potret di situacionan hopi peligroso riba caminda. “Cosnan asina no por sigui mas”, e defensa a argumenta.

FORMA DI INFORMA

E defensa di e dos companianan tabata cu no tabatin ningun alerta, ningun carta sino cu di un dia pa otro, a anuncia via un conferencia di prensa, y despues a cuminsa piki e aparatonan. A mustra cu a bin cu e negoshi, pasobra e demanda tabata grandi. Specialmente mirando e situacion financiero, di transporte na e.o. Aruba. E dama representando Green Bikes, dado momento a bira emocional den corte, bisando cu e tin 14 aña riba e isla, y kier a contribui cu algo positivo pa e isla, den cuadro di energia berde. A cana tur caminda, multiple biaha, a cana tres aña pa por a haya un precario, y despues a haci tur loke mester a haci, a hasta papia cu dos minister di gabinete pasa, pero nunca mas a tende di nan. E accion di gobierno a perhudica e companianan, cu tin 8 y 5 trahado respectivamente, y cu e operacion awor ta paga. E base di argumento ta cu gobierno no por kita e aparatonan, sin un base legal. Y e forma cu a haci esaki, no ta un base legal. Ademas, no tabata cla segun e companianan, riba kico gobierno ta basa su mes pa a actua asina. E doño di e otro compania a bisa tambe cu na 2022 a aplica pa precario, pero no a haya esaki tampoco. 

CONCLUSION

Huez a cera e tratamento, y a anda cu tur dos partido, y por mira cu tur dos partido por tin fayo, uno unda cu gobierno no a notifica e companianan respectivo di nan accion, y e companianan, pa ta operando sin un permiso. A cera tratamento di e caso, y lo dicta sentencia dia 22 di mei proximo.