Hantavirus: Stewardess hulandes di KLM ta test negativo , pero mas britaniconan infecta

AMSTERDAM - World Health Organization (OMS) a confirma cu e stewardess hulandes di KLM cu tabata den aislamiento na Amsterdam, no tin hantavirus. Testnan a confirma cu e no a wordo infecta, apesar cu durante su trabou na Johannesburg el a drenta den contacto cu un hende hulandes cu posteriormente a muri despues di a wordo infecta abordo di crucero MV Hondius.

E dama hulandes cu tabata riba e crucero a bira demasiado malo pa bula di regreso pa Hulanda y a wordo saka rapidamente for di e barco na Sudafrica. Un dia despues, el a muri debido na complicacionnan di hantavirus.

Mientrastanto, autoridadnan di salud den Reino Uni a confirma cu dos britanico tin hantavirus, mientras un di tres persona posiblemente tambe ta infecta. E ultimo persona ta actualmente riba isla remoto Tristan da Cunha den Atlantico Zuid. E crucero a bishita e isla na mitar di april.

OMS anteriormente a reporta cinco caso confirma di hantavirus, aunque no ta cla si e dos britaniconan tabata inclui den e cantidad. Hasta awor, tres persona a muri como consecuencia di e outbreak.

E crucero ta rumbo pa Tenerife, unda e lo yega e weekend aki. Minister di Asuntonan Exterior di Hulanda a indica cu gobierno hulandes ta trahando hunto cu Spaña, OMS y Ministerio di Salud pa organiza un desembarque y cuido seguro pa e pasaheronan. Segun minister, e operacion ta “hopi complejo” y detayenan lo wordo comunica prome na pasaheronan y nan famianan.

Hulanda tambe a manda dos specialistanan medico pa e barco, incluyendo un experto den enfermedadnan infeccioso di Hospital Militar Central na Utrecht.