AAA:Mas di tres miyon pasahero a pasa via aeropuerto di Aruba na 2025

ORANJESTAD - Aruba Airport Authority (AAA) a publica su Relato Anual 2025 bou di e titulo “Shifting Gears – Accelerating Our Path Forward”, resaltando un aña di transicion, crecimiento y aceleracion di proyectonan importante pa futuro di aeropuerto di Aruba.

Segun e rapport, mas cu 3.4 miyon pasahero a viaha via aeropuerto AUA durante 2025, mientras cu AAA a sigui fortalece conectividad aereo, calidad di servicio y capacidad operacional.

Un di e logro principal tabata apertura oficial di Gateway 2030 Fase 1A, incluyendo un sala nobo di check-in y sistema moderno pa maneho di maleta, cu a yuda mehora flujo di pasahero, especialmente pa biaheronan rumbo na United States.

AAA tambe a anuncia progreso den Fase 1B y preparacion pa Fase 2 di Gateway 2030, enfoca riba expansion y modernisacion di aeropuerto pa largo plazo.

E rapport ta reconoce cu aumento den volumen di pasahero y limitacionnan di infrastructura a crea presion operacional durante 2025. Ademas, AAA a pasa pa un periodo di transicion di liderazgo y a enfrenta requisito riguroso pa certificacion di aerodromo.

No obstante e retonan, satisfaccion di pasahero a keda halto, cu puntuacion di 4.12 y nivel general di satisfaccion di 3.99 riba un escala di 5.

AAA tambe a subraya su compromiso cu sostenibilidad y proteccion ambiental, incluyendo implementacion di un Environmental Management System (EMS) y iniciativanan ESG y CSR enfoca riba desarrollo sostenible di Aruba.

CEO interino James Fazio a describi 2025 como “un aña di transicion y impulso”, destacando cu AAA ta posiciona estrategicamente pa futuro mientras cu ta acelera Gateway 2030 y fortalece resiliencia operacional y financiero.

Desde januari 2026, AAA tambe a duna bonbini na su CEO nobo, Jonny Andersen, marcando un fase nobo di liderazgo pa e organizacion.