Iberostar ta fortalece proteccion di turtuganan marino na Aruba

ORANJESTAD - Iberostar Hotels & Resorts ta continua reforsa su compromiso cu medio ambiente y conservacion di turtuganan marino na Eagle Beach. Recientemente, personal di hotel a ricibi entrenamento special di TurtugAruba pa siña con pa guia huespednan y proteha turtuganan durante temporada di broei.

Entrenamento a enfoca riba diferente especie di turtuga marino manera Driekiel, Karet, Turtuga Blanco y Cahuet, y tambe riba practicanan importante pa proteha nan habitat, incluyendo kita stoel y material di beach anochi y uza luz amigabel pa naturalesa.

Iberostar ta haci un yamada na bishitantenan pa no core auto riba beach of cerca di areanan di e neishi, pues esaki por afecta seriamente e proceso di broei. Tambe ta pidi pa hende mantene distancia, evita luz fuerte y no stroba turtuganan of nan webonan.

Temporada di broei di turtuga marino ta core for di maart te september, mientras cu e baby turtuganan ta sali for di neishi entre mei y november. Segun e informacion comparti, solamente un di cada mil baby turtuga ta yega edad adulto, haciendo proteccion di e especienan aki hopi importante.

E iniciativa ta forma parti di e movimiento “Wave of Change” di Iberostar, lansa na 2017, cu ta enfoca riba proteccion di oceano y biodiversidad marino pa medio di cooperacion cu organizacionnan local y programanan di conservacion internacional.